DILI, 09 Agostu 2025 (TATOLI)–Federasaun Futeból Timor-Leste (FFTL), Sábadu ne’e, iha Otél Palm Springs Fatuhada, Dili, realiza kongresu estraordináriu ba dala-12 hodi halo aprovasaun dokumentu organizasionál FFTL nian ba períodu 2025.
Kongresu ne’e loke direta husi Vise-Prezidente Konfederasaun Desportiva Timor-Leste (CDTL-sigla portugeza), Inocêncio da Silva, no iha nia intervensaun husu ba kongresista sira atu kontribui ba kongresu ida di’ak atu lori futeból bá-oin.
“Kongresu importante tebes atubele halo aprovasaun ba ata sira-ne’ebé oinsá atu dezenvolve ita-nia futeból iha nasaun ida-ne’e. Fiar katak kongresu ida-ne’e sei la’o ho susesu,” Inocêncio hateten.
Tuir ajenda ne’ebé iha, ba dahuluk, konvokasaun membru kongresu (roll call) no deklarassun katak kongresu konvoka tuir estatutu FFTL no mós aprovasaun ba ajenda kongresu.
Aleinde ne’e, nomea delegadu na’in-tolu (3) atu verifika ata ofisiál, nomea eskrutinadór na’in-tolu (3) atu verifika votasaun, aprova minuta kongresu eletivu FFTL na’in-11 iha Janeiru 2025, aprezenta no aprova relatóriu anuál FFTL tinan 2024, aprezenta no aprova relatóriu estatutáriu auditu FFTL tinan 2024, aprezenta no aprova relatóriu finanseiru anuál FFTL tinan 2024.
Kongresu referidu, partisipa husi kongresista sira mak hanesan Asosiasaun Futeból Munisipiu sira hanesan Ainaru, Aileu, Baukau, Bobonaru, Likisá, Oekusi, Vikeke, Lautein, Kovalima, Manufahi, Manatutu, Dili Leste, Dili Oeste no asosiasaun sira hanesan Juveníl, Femenina, Arbitrajen, Treinadór, Futsál, kampiaun Liga Timor-Leste Primeira Divizaun no kampiaun Segunda Divizaun.
Kongresu ne’e observa direta husi reprezentante FIFA, Asian Football Confederation (AFC) no ASEAN Football Federation (AFF).
Jornalista: Hortencio Sanchez
Editór: Xisto Freitas da Piedade
