BOBONARU, 14 Agostu 2025 (TATOLI)—Kompañia lokál Lislap Naroman Unipessoal, Lda, garante sei finaliza projetu konstrusaun eskola sala-neen iha Ensinu Báziku Sentrál (EBC-sigla portugeza) Samutaben, Postu Administrativu Kailaku, Munisípiu Bobonaru molok tama ba ezame nasionál tinan letivu 2025, tanba daudaun ne’e progresu fíziku atinje ona 60,4%.
Téknika Kompañia Lislap Naroman Unipessoal, Lda, Angelino Araújo informa obra ne’e implementa iha fulan-Maiu 2025 ne’e liuhusi projetu Planu Dezenvolvimentu Integradu Munisipál (PDIM) tinan 2025 no agora to’o ona faze monta kuda-kuda ho taka kalén, tuir planu iha semana oin hahú nahe no reboka (plester).
Angelino garante projetu sei finaliza iha fulan-Setembru tanba estoke materiál lokál no fabrikadu garantidu.
“Agora ami servisu fulan tolu ona. Tuir kontratu, PDIM ne’e fulan hitu, maibé ami koko para finaliza iha fulan lima. Ami-nia alvu ne’e entre fulan-Setembru ho Outubru ne’e ami bele finaliza para fó ba eskola uza hodi prepara ba ezame nasionál. Ami garante obra ne’e kualidade,” nia informa ba jornalista sira iha lokál traballu, Kinta ne’e.
Notísia relevante: Sala tolu iha EBC Samutaben la dignu ba estudante sira
Aleinde ne’e, Diretór EBC Samutaben, Juvelino Borges konsidera obra ne’e bele fasilita ona estudante ho manorin sira halo ensinu no aprendizajen iha fatin dignu.
“Ami orgullu no agradese ba Governu tanba konstrui ona ami-nia eskola foun. Uluk ami-nia eskola tuan ne’e kondisaun ladi’ak difikulta estudante sira atu partisipa ensinu no aprendizajen. Agora sala foun neen ho tan sala tolu ne’e hanoin di’ak ona,” nia dehan.
Tuir dadus, tinan letivu 2025 EBC Samutaben akumula estudante hamutuk na’in-390 husi primeiru síklu to’o terseiru síklu no totál profesór na’in-17.
Projetu ne’e gasta orsamentu hamutuk $162.251,45 no sei termina iha loron 24 fulan-Outubru 2025.
Jornalista: Sergio da Cruz
Editór: Xisto Freitas da Piedade
