VIKEKE, 10 Setembru 2025 (TATOLI)—Asosiasaun Feto Potensiál (AFP) Munisípiu Vikeke servisu hamutuk ho Komisaun Nasionál Eleisaun (CNE-sigla portugeza), Kuarta ne’e, realiza kompetisaun diskursu públiku ba feto potensiál sira kompete iha nivel Munisípiu Vikeke.
Tema ba kompetisaun mak “Partisipasaun Inkluziva ba eleisaun munisipál iha Estadu direitu demokrátiku”.
Iha kompetisaun ne’e, Prezidente AFP Munisípiu Vikeke, Luciana Guterres haktuir kompetisaun diskursu públiku ne’e apoiu husi CNE.
“Kompetisaun diskursu públiku ida-ne’e ami hetan apoia husi CNE. Tanba ne’e, ami hato’o agradesimentu ba CNE bele konsidera ami-nia pedidu. Kompetisaun ida-ne’e ami realiza foin dahuluk iha Munisípiu Vikeke envolve feto potensiál sira-ne’ebé reprezenta partidu lima iha Parlamentu Nasionál (PN) hanesan FRETILIN, PD, CNRT, KHUNTO no PLP,” Luciana Guterres hateten iha Salaun Edukasaun Munisipál Vikeke.
Prezidente ne’e esplika kompetisaun referida atu promove partisipasaun feto iha vida polítika, iha-ne’ebé kada postu reprezenta feto ida no munisípiu mak na’in-rua, ho totál kompetitór hamutuk na’in-neen.
“Kompetisaun ida-ne’e ita la’ós atu manán buat boot, maibé liuhusi kompetisaun ne’e atu promove feto iha vida polítika,” nia subliña.
Luciana enkoraja feto potensiál Munisípiu Vikeke tenke banati tuir feto Parlamentu Nasionál, tanba daudaun ne’e feto maluk sira tuur iha Parlamentu maihusi kór partidu oinoin, maibé sira foti desizaun ruma la haree ba kór, haree liubá partisipasaun feto nia direitu.
Komisáriu CNE enkoraja feto potensiál
Iha parte seluk, Komisáriu Komisaun Nasionál Eleisaun (CNE-sigla portugeza) Destakadu Munisípiu Vikeke, Olávio da Costa Montero Almeida enkoraja feto potensiál Munisípiu Vikeke prepara aan partisipa debate públiku ne’ebé CNE sei realiza iha 26 Setembru iha Munisípiu Vikeke.
“Ha’u husu feto potensiál Munisípiu Vikeke labele lakon oportunidade tanba tempu badak ami sei realiza tan debate públiku ida iha Munisípiu Vikeke ho tema ‘Ita prontu ba eleisaun munisipál’ ba ita-nia partidu polítiku sira-ne’ebé asentu iha Parlamentu Nasionál. Ha’u husu feto pontensiál sira hakbesik aan ba idak-idak nia líder partidu sira iha Vikeke atu fó konfiansa ba ita-boot sira hodi partisipa iha debate,” Olávio da Costa Monteiro Almeida ba TATOLI, iha Salaun Edukasaun Munisípiu Vikeke, Kuarta ne’e.
Komisáriu CNE ne’e hatutan feto sira husi Munisípiu Vikeke labele lakon ho mane sira tanba debate públiku CNE realiza daneen ona iha munisípiu sira, maibé partisipasaun feto la másima.
“Debate ne’ebé ami realiza ne’e partisipa feto husi partidu lima ne’ebé asentu iha Parlamentu Nasionál, ne’e ami haree iha debate feto ida rua de’it mak partisipa. Ha’u prefere debate ne’ebé atu realiza ne’e feto tenke partisipa barak,” nia hato’o.
Nune’e, nia husu Prezidente Asosiasaun Feto Potensiál (AFP) Munisípiu Vikeke tenke luta hodi reziste hodi hetan oportunidade iha debate públiku tanba debate ne’e públiku kona-ba polítika nian.
“Pelumenus iha reprezentasaun feto nian iha debate públiku hodi hato’o netik aspirasaun polítika feto potensiál nian iha Munisípiu Vikeke,” nia tenik.
Iha fatin hanesan, Prezidente AFP Munisípiu Vikeke, Luciana Guterres hateten AFP Munisípiu Vikeke prontu partisipa iha atividade sira-ne’ebé realiza iha Munisípiu Vikeke hodi ko’alia kona-ba direitu feto nian.
“Ami feto potensiál Munisípiu Vikeke prontu partisipa ba kualker atividade sira-ne’ebé realiza iha Munisípiu Vikeke. Liuhusi debate sira-ne’e atu promove partisipasaun feto sira-nian iha vida polítika,” nia informa.
Jornalista: Vitorino Lopez da Costa
Editór: Xisto Freitas da Piedade
