DILI, 03 Outubru 2025 (TATOLI)-Bankada opozisaun husi Partidu Frente Revolsionária Independente Timor-Leste (FRETILIN) solisita ba Governu atu iha proposta Orsamentu Jerál Estadu (OJE) 2026 fó prioridade ba iha setór produtivu hanesan agrikultura no seluk tan.
Deputada FRETILIN, Maria Angélica Rangel, dehan hafoin halo leitura mezmu la ho detallu ba proposta lei OJE 2026 ho montante billaun $2,291 ne’ebé Governu aprezenta ona mai Parlamentu, husi tetu ne’ebé iha ba setór produtivu Governu tau de’it 34%.
Tuir nia, setór produtivu ne’ebé sai hanesan povu tomak nia espetativa presiza hetan prioridade iha alokasaun orsamentu boot hodi dezenvolve liután nia sustentabilidade.
“Lei OJE ne’e kompeténsia Governu nian halo alokasaun orsamentu tuir nia programa. Tuir ita hotu nia espetativa tenke iha ne’ebá [alokasaun orsamentu boot ba setór produtivu], tanba FRETILIN sempre dehan ita-nia osan ne’e pró-povu”, Maria Angélica hateten ba Tatoli iha Parlamentu, ohin.
Nune’e tenke halo investimentu iha infraestrutura, área sosiál, hodi povu ne’e sente duni osan ne’e halo duni dezenvolvimentu.
Hanesan deputadu sei tau atensaun ba kestaun referida, liuhusi diskusaun proposta OJE.
Preokupa kapasidade ezekusaun
Maria Angélica dehan Governu kumpre submisaun proposta OJE 2026 tuir Lei Enkuadramentu Orsamentál no Jestaun Finanseira Públika iha 01 Outubru mai Palamentu.
Maibé, haree husi tetu orsamentu ne’ebé iha, Governu nia ezekusaun OJE 2025 to’o trimestre daruak sei ki’ik.
“Ita hotu akompaña to’o horisehik, Komisaun C [Finansa Públika] simu relatóriu trimestre daruak ezekusaun no seu todo mínimu tebes, foin atinje de’it 34%”, nia lamenta.
Liuliu Fundu Infraestrutura, Governu tau pur volta millaun $400 m, ninia ezekusaun foin 13%. “Se Governu mai ho planu no orsamentu, katak iha planu ne’ebé di‘ak ona hodi ezekuta, tanba lei orsamentu ne’e anualidade”, dehan.
Lembra katak Ministériu Finansa (MF) iha loron 01 Outubru ne’e submete ona proposta lei OJE ba tinan fiskál 2026 ho montante billaun $2,291 ba PN.
Tuir Portál Transparénsia Ministériu Finansa, to’o iha loron 02/10), ezekusaun OJE 2025 ho orijen $2,617,138,274, kompromisu $92,185,525.50, obrigasaun sira $102,135,153.65, atuál $1,164,750,006.36, saldu $1, 258,067,588.49 no ezekusaun 48.4%.
Notísia relevante: Komisaun C prepara ona kalendáriu diskusaun proposta OJE 2026
Jornalista: Nelson de Sousa
Editora: Maria Auxiliadora
