AINARO, 13 Outubru 2025 (TATOLI)—Prezidente Repúblika, José Ramos-Horta, kontinua preokupa ho kondisaun infrastrutura báziku iha zona fronteira liuliu iha Kovalima ne’ebé ninia postu administrativu Fatumea, Fohorem no Postu Administrativu Tilomar ne’ebe besik fronteira.
Notísia Relevante: Ramos-Horta: “Joven sira tenke estuda maka’as atu Timor bele sai boot”
“Iha-ne’e ha’u nafatin ko’alia, ha’u preokupa tebes ho infrastrutura báziku iha fronteira sira, estrada aat tebes, postu ba Polísia sira kondisaun aat tebes,” Ramos-Horta hateten ba povu Maubisse bainhira sai oradór prinsipál iha programa diálogu ho tema “Prezidente Ramos-Horta ho Povu” iha Pauzada Maubisse, Munisípiu Ainaru, segunda ne’e.
Nia dehan, problema ne’ebé nia ko’alia iha diálogu ne’e informa ona ba Primeiru-Ministru Kay Rala Xanana Gusmão.
“Ha’u fó hatene ona ba Maun-Boot Xanana, ita nia Primeiru-Mimistru, maibé nia resposta mai ha’u sei tau orasamentu iha tian 2026, entaun tinan oin hadi’a ona infrastrutura báziku iha ne’ebá,” Horta dehan.
Xefe Estadu ne’e subliña, problema hotu nia bele ko’alia maibé kompeténsia hotu iha Governu nia liman.
“Hanesan Prezidente ha’u ko’alia kona-ba saida mak seidauk la’o, maibé kompeténsia hotu ne’e Governu nian, Governu mak foti medida hodi rezolve,” nia dehan.
Programa “HAKBESIK” ho topiku “Prezidente Ramos-Horta ho Povu” hanesan programa ida-husi Agência TATOLI ne’ebé atu lori Estadu besik ho povu no rona direta povu nia preokupasaun no fó informasaun ba povu kona-ba papel importante Estadu nian.
Jornalista : Hortencio Sanchez
Editór : Cancio Ximenes
