VIKEKE, 21 Outubru 2025 (TATOLI)—Administradór Postu Administrativu Lakluta, Munisípiu Vikeke, Pascoal Gama Martins prefere populasaun Munisípiu Vikeke fa’an karau tenke hetan lisensa husi xefe suku sira atu evita karau lakon.
“Se mak fa’an karau tenke hetan lisensa husi autoridade no servisu agrikutura sira hodi evita ema nauk animál sira,” Pascoal ba TATOLI iha Postu Vikeke Vila, Tersa ne’e.
Iha fatin ketak, abitante Cosme Sarmento relata katak foin lalais akontese iha Postu Vikeke Vila abitante ida nia karau kuaze neen ema nauk hotu no na’in buka tuir la hetan.
“Foin lalais ne’e Diretór PNDS ninia karau kuaze neen besik iha ninia uma, kalan ema nauk dala ida de’it. Ida-ne’e faktu tanba Diretór PNDS ninia uma ami besik malu mak nia karau lakon. Maibé, laiha ema ida mak ko’alia kona-ba kontrola animál. Tan ne’e, diretór agrikulrura kria kondisaun ruma hodi kontrola komunidade nia animál,” nia hato’o.
Hatán ba preokupasaun ne’e, Diretór Servisu Agrikultura Munisípiu Vikeke, Olívio F. Soares, haktuir kona-ba tránzitu animál ne’e kada loron ema lori sai animál hanesan karau no kuda iha fulan ida-ne’e ema lori sai husi Munisípiu Vikeke hamutuk 200-resin.
“Ami sempre fó lisensa ba animál nia na’in sira bainhira sira mai iha ami-nia fatin, maibé tula karau ne’e iha komunidade nia fatin. Atu evita karau lakon, ita iha brinku, maibé ita bá atu tau brinku karau na’in sira lakohi. Brinku ne’e atu ema lori karau mai iha ami-nia fatin karik ami bele hatene brinku ninia númeru no hatene na’in karau tanba ita rejista,” nia informa.
Jornalista: Vitorino Lopes da Costa
Editór: Xisto Freitas da Piedade
