DILI, 05 Novembru 2025 (TATOLI)–Treinadór Prinsipál Selesaun Nasionál Timor-Leste, José Pedro Salazar lakohi promete gaña pontu maibé garante sei hasa’e prestasaun ekipa bainhira kontra Tazaskistaun iha jogu kontinuasaun Grupu A faze kualifikasaun AFC Asian Cup 2027.
Treinadór ne’e rekoñese Tazaskistaun no Filipina nu’udár ekipa forte iha Grupu A ne’ebé koloka hamutuk ho Maldiva inklui Timor-Leste, nune’e ekipa nasionál kontinua halo preparasaun hanesan antes ne’e hala’o ona bainhira kontra Filipina.
Notísia relevante: Selesaun nasionál hahú treinu antes hasoru Tazaskistaun
“Ha’u labele garante manán ka lae maibé ita hakarak jogu kontra Tazaskistaun bele hasa’e kualidade ekipa selesaun nasionál,” Zé Pedro infroma ba TATOLI iha edifísiu Federasaun Futeból Timor-Leste (FFTL), Bairros dos Grilos, Kuarta ne’e.
Zé Pedro relata jogadór sira kontinua treinu no foku ba tátika inklui estratéjia nune’e kada jogu ne’ebé ekipa nasionál partisipa bele hasa’e liután prestasaun inklui futuru eleva kualidade iha nivel internasionál.
Tuir kalendáriu, Timor-Leste sei hala’o jogu kontra Tazaskistaun iha Darwin-Austrália, 18 Novembru iha-ne’ebé rezultadu jogu volta dahuluk derrota ho skor mihis 1-0 ne’ebé hala’o iha Estádiu Sentrál Repúblika Tazaskistaun, 25 Marsu inísiu tinan-ne’e.
Entretantu, tuir tabela klasifikasaun Grupu A lidera husi Filipina ho pontu sanulu (10), rezultadu husi manán tolu (3), impata ida (1), Tazaskistaun okupa iha pozisaun daruak ho pontu sanulu (10).
Timor-Leste okupa iha pozisaun datoluk ho pontu tolu (3), rezultadu manán ida (1), derrota tolu (3) no Maldiva iha pozisaun ikus ho pontu 0 hafoin derrota jogu haat (4).
Jornalista: Natalino Belo
Editór: Xisto Freitas da Piedade
