DILI, 16 Novembru 2025 (TATOLI) – Sekretáriu Estadu Komunkasaun Sosiál, Expedito Dias Ximenes, informa katak segunda-feira (17/11) nu’udar loron ikus ba jerente orgaun komuniksaun sira seluk submete lista jornalista sira nian hodi ba konkorre vaga bolsa estudu hamutuk 10.
Bolsa estudu ne’e oferese husi Sekretaria Estadu Komunikasaun Sosiál (SEKOMS), parseria ho Universidade Universidade Nacional Timor-Lorosa’e (UNTL), Universidade Katólika Timor (UCT-sigla portugés) no Universidade Orientál Timor-Lorosa’e (UNITAL).
“Horseik, Ministru Ensinu Superiór, [Siénsia no Kultura] kontaktu ha’u atu submente jornalista sira-nia dokumetu, maibé foin nain hat. Entaun, ita prolonga too segunda. Too loron ne’ebá mak média na’in sira la haruka nafatin sira nia jornalista nia naran mai, nain hat ne’e mak ami atu propoen ba Ministeriu Ensinu Superiór, Siensia no Kultura”, nia dehan ba Tatoli, iha marjem lansamentu Plataforma Sentru Informasaun Suku, iha Suku Maskariñas, Postu Administrativu Vera-Krús, Munisípiu Dili, sabdu ne’e.
Tuir governante ne’e, Jornál Indepedente, Lafaek News, Timor Post no ida seluk tan mak entrega ona lista jornalista sira nian.
Iha parte seluk, Diretór Departamentu Komunikasaun Sosiál UNTL, Roberto da Costa Pacheco, informa departamentu mantein servisu ho governu hodi fó aula ba jornalista sira, maibe konforme simu lista husi universidade.
“Ita la sei deziste, maibé prontu servisu ho governu atu fo aula ba jornalista sira tanba antes ne’e Departamentu Komunikasaun Sosiál servisu hamutuk ona ho asosiasaun jornalista sira hodi fó apoiu prática jornalizmu ba estudante, ho nune’e prontu atu fó teoria ba ita-nia jornalista sira,” nia dehan.
Dirijente ne’e rekorda katak programa ekstensaun ou turma ekstensun nafatin laiha, maibe se jornalista sira hetan bolsa estudu maka sira tenki tuir aula regulár hanesan ho estudante sira seluk.
Notísia relevante: Reitór UNTL konsidera presiza iha bolsa estudu ba jornalista
Jornalista: Ivonia da Silva
Editora: Isaura Lemos
