DILI, 18 Novembru 2025 (TATOLI)—Ministru Obra Públika (MOP), Samuel Marçal, informa Governu hadi’a no loke espasu estrada urbana iha Dirasaun Kuluhun ba Bekora ne’e fó prioridade ba movimentu transporte nomos fó espasu ba ema la’o ain sira.
Notísia Relevante: Prosesu reabilitasaun estrada diresaun Kuluhun ba Bekora atinje 40%
Nia hateten, kona-ba preokupasaun públiku ba konstrusaun jardin iha Kuluhun okupa liu espasu estrada ne’e halo bazeia ba sé mak atu halo movimentasaun, entaun kompara movimentu la’o ain ho uza transporte ne’e, sé mak barak liu, normalmente ema la’o ain maka barak entaun Governu halo estrada la’ós fasilita de’it ba movimentasaun transporte.
“Tanba ne’e mak ita presiza mós fatin luan ba komunidade la’o ain sira liuliu sira-ne’ebé leba modo no aifuan sira hodi fó eapasu ba sira halo movimentu ho seguru,” Ministru informa ba jornalista sira iha PN, ohin.
Aleinde ne’e, nia dehan, Governu fó prioridade mós ba sira-ne’ébé tuur iha kadeira roda (kursi roda), entaun buat sira-ne’e hotu mak Governu tau atensaun, tanba sira mós nu’udar sidadaun hotu atu asesu ba fasilidade públiku.
Lembra katak Governu daudaun ne’e halo alargamentu estrada husi Kuluhun to’o terminál Bekora ho luan metru 23,74, naruk kilómetru haat (4), projetu ne’e sei implementa husi kompañia Montana Diak.
Notísia Relevante: MOP sei publika lista naran afetadu ba alargamentu estrada Kuluhun-Bekora
Jornalista : Alexandra da Costa
Editór : Cancio Ximenes
