OEKUSI, 20 Novembru 2025 (TATOLI) – Xefe Departamentu Eletrisidade De Timor-Leste (EDTL) Rejiaun Administrativa Espesiál Oekusi Ambeno (RAEOA), Antão Cabal, fó-sai, ema deskoñesidu estraga fiu liña eletrika no tuda rahun ahi sira iha ponte Noefefan, ne’ebé lokaliza iha suku Lifau sub-rejiaun Pante Makasar hodi rezulta ahi mate no labele lakan iha tempu kalan kuaze fulan tolu ona.
“Iluminasaun iha ponte Noefefan, primeiru liña distribuisaun lobul tesik nian, atu fornese enerjia ba ponte referida ema deskoñesidu komesa sobu no destroi ita-nia fiu anderdroon ne’ebé ita instala iha ponte, ne’e mak afeta durante fulan tolu ona labele lakan iha tempu kalan, tanba bola lampu sira mós tuda rahun hotu” Antão Cabal ba jornalista sira iha Oekusi, ohin.
Notísia relevante:Ponte Noefefan Konstrui ho Orsamentu Miloens $17,5
Cabal informa, atu solusiona kauza ne’e, parte EDTL simu ona orientasaun husi Prezidente Autoridade RAEOA, atu hadi’a liuhusi polítika Konsellu Administrasaun Fundu Infraestrutura (FAKI) nian, maibé antes ne’e suspendidu ona husi autoridade sesante.
“Entaun ami sei esforsa tuir ita-nia kondisaun ne’ebé iha, atu ativa fila-fali iluminasaun sira iha ponte Noefefan, maibé depende husi ita-nia kondisaun husi EDTL nian,” nia afirma.
Tuir Xefe Departamentu, ho akontesimentu ne’e, parte EDTL sei koordena ho Autoridade komunitária sira iha suku Lifau, hodi rekolla dadus no informasaun kona-ba akontesimentu ne’e.
“Ami sei rekolla hela dadus no informasaun, depois koordena ho Autoridade lokál sira iha suku Lifau, karik iha dadus balu iha sai hanesan evidénsia ida, nune’e bele ita bele prosesa, tanba estragu ba fiu lobul tesik nian distánsia metru lima, ne’ebé afeta totál ba ponte tomak labele naroman iha tempu kalan,” nia hateten.
Notísia relevante:Ponte Noefefan Halakon Populasaun 3600 Nia Izolamentu
Hatan ba kestaun ne’e, Xefe Suku Lifau, Delfino Sole, rekoñese katak iluminasaun liña elétrika iha área ponte Noefefan la funsiona kuaze fulan tolu, nia parte la rekoñese nia kauza prinsipál.
“Ita lahatene semak tesi no estraga, maibé loos, kuandu ita liuhusi ne’ebá la lakan kleur ona, tanba iha ne’ebá fatin públiku ha’u labele indika ema ida, ne’ebé ita sei rezolve no kontinua fó seguránsa hodi haree hamutuk, tanba ne’e fasilidade públiku nian,” nia hateten.
Notísia relevante:Autoridade RAEOA klarifika ema deskoñesidu mak sobu plaka iha ponte Noefefan
Ponte Noefefan neʼebé lokaliza iha Suku Lifau, Sub-Rejiaun Pante Makasar, konstrui ho Orsamentu Jerál Estadu (OJE) nian ho verba millaun $17,5, husi antigu Prezidente Autoridade RAEOA, Mari Alkatiri.
Medida konstrusaun ponte ne’e ho nia naruk metru 380 no luan metru 6, ne’ebé hahú konstrusaun iha Abril 2015, ponte ne’e ho padraun internasionál ne’ebé konstrui hosi empreza estatál Indonézia, Adi Karya, no inaugura husi Prezidente Repúblika, Francisco Guterres ‘Lú-Olo’ iha 2017.
Jornalista: Abílio Elo Nini
Editór: Rafael Ximenes de A. Belo
