DILI, 20 Novembru 2025 (TATOLI)—Ministériu Saúde halo ezekusaun pagamentu iha saláriu vensimentu ba pesoál saúde sira-ne’ebé servisu ho durasaun naruk “over time” atinje ona 73% hahú husi fulan-Jullu to’o Setembru 2025, enkuantu iha fulan Outobru nian MS foin remata no fulan-Novembru seidauk ramata tanba halo pagamentu kada trimestrál.
Ministra Saúde, Elia Amaral, hateten kona-ba pagamentu ba pesoál saúde sira-ne’ebé hakna’ar-an iha Hospitál Nasionál Guido Valadares inklui mós iha sentru saúde no klínika, sira sei selu tuir etapa trimestrál nian.
“Ha’u hanoin, ita-boot sira bele haree iha relatóriu proposta 2025 nian, ami-nia ezekusaun hodi selu ba over time sira-ne’e iha 73%. Signifika katak ita selu hela no iha trimestre ikus nian sei iha prosesu nia laran,” Ministra Saúde ne’e informa iha debate espesialidade, PN, ohin.
Kona-ba enkuadramentu ba pesoál saúde ne’e, nia hateten, Governu iha ninia polítika hodi fó promosaun ba pesoál saúde sira-ne’ebé prienxe ona rekezitu hamutuk 2016 ne’ebé sei tau prioridade husi saláriu médika jerál ba espesialista nian, restu husi ne’e halo prosesu fali ba tinan oin tanba seidauk prienxe rekezitu.
Parlamentu Nasionál mós aprova Orsamentu Jerál Estadu (OJE) ba Hopitál Nasionál Guidu-Valadares (HNGV) iha debate espesialidade ho votus afavór 42, kontra 0 no abstensaun 21.
Orsamentu na HNGV ne’eTuir livru orsamentu ne’ebé aloka ba Ospitál Nasionál Guidu-Valadares ne’e, aloka ba sálari hamutuk $20.860.647, kompostu husi saláriu vensimentu $12.136.963, servisu $4.110.284, kapitál menor $4.350.000 no kapitál dezenvolvimentu $263.4000 sei fahe mós ba programa prioridade tolu no subprograma.
Programa prioridade funsionamentu no dezenvolvimentu institusionál prevee $3.205.957, kuidadu saúde sekundáriu no tersiáriu $17.652.690 no programa saúde prevee $2.000. Enkuantu kona-ba subprograma 11 ne’e sei prevee hamutuk $20.860.647.
Jornalista : Alexandra da Costa
Editór : Cancio Ximenes
