OEKUSI, 28 Novembru 2025 (TATOLI) – Primeiru-Ministru (PM), Kay Rala Xanana Gusmão, sesta ohin, prizide selebrasaun loron proklamasaun unilaterál independénsia 28 Novembru iha Rejiaun Administrativa Espesiál Oekusi Ambeno (RAEOA).
Iha diskursu, Xefe Governu ne’e, informa, tuir loloos partisipa komemorasaun loron proklamasaun unilaterál independénsia 28 Novembru iha nasionál, maibé deside hamutuk ho povu Oekusi tanba, iha Oekusi enfrenta hela situasaun difisil ba asuntu polítika inklui lala’ok administrasaun públika.
“Ha’u mai iha Atoni sira, loloos ha’u selebra iha Dili, tanba Oekusi iha hela situasaun difisil, imi kala haree ba malu oin la mós, balu dehan ha’u matenek liu ó, tanba ne’e ha’u husu Atoni-oan sira hamutuk, imi mak sei lori Oekusi ba oin, sei imi la hamutuk ami husi Manatutu mak sei mai,” PM Xanana iha kampu 01 de Maiu Palaban, ohin.
Entidade tuteladu no superentende RAEOA no ZEEDOA ne’e, enkoraza foinsa’e sira no intelektuál sira iha Oekusi, buka hatene istória kona-ba akontesimentu loron proklamasaun 28 Novembru iha 1975, tinan 50 liuba.
“Ne’e duni, ha’u mai selebra tinan-50 loron proklamasaun iha Oekusi, la’ós atu hasa’e no hatuun de’it bandeira, la’e, atu konta istória ne’e liu-liu ba foinsa’e sira, tanba saida mak mosu 28 Novembru no tanba saida mak unilaterál ne’e,” nia hateten.
Iha ámbitu ne’e, Primeiru-Ministru enkoraja povu Oekusi, atu hatudu an brani enfrenta dezafiu ho hanoin ida katak, tenke la’o ba oin.
“Ha’u husu ba Atoni-oan sira hotu, momentu iha difisil ruma, komplexu ruma atu hadi’a ita-nia rai ne’e, lalika hakfodak no lalika ta’uk, ba oin maibé uza kakutak, ko’alia ba malu, muda karatér. Atoni-oan sira tenke hatudu aan atu ami Atoni duni, tan ne’e hakuak bo’ot ba imi hotu. Ita selebra ne’e ho hanoin ida fó valór no korajen, ita-nia líder sira iha tempu ne’ebá, sira mós husu, agora ho korajen mós ba imi hotu hodi lalika ta’uk bainhira situasaun komplexu ruma ka difisil ruma – hanoin didi’ak. Haree didi’ak opsaun sira-ne’e, ita la’o ba oin,” nia apela.
Notísia relevante:Xanana: “Hakru’uk ba ‘korajen’ timoroan sira-ne’ebé uluk deside proklama unilateralmente Timor nu’udar RDTL”
Entretantu, tema ba loron proklamasaun 28 Novembru 2025 ne’e, “Que a celebrar estes 50 anos, do passado, nos assegure confiança no presente e esperança no futuro”.
Jornalista: Abílio Elo Nini
Editór: Rafael Ximenes de A. Belo
