DILI, 04 Dezembru 2025 (TATOLI)–Portavós Komando Jerál Polísia Nasionál Timor-Leste (PNTL), Superintendente Polísia João Belo dos Reis, informa durante semana ikus fulan-Novembru nian ne’e PNTL konsege rejista kazu krime hamutuk 69 iha territóriu.
“Husi númeru kazu 69 ne’e iha kazu lima mak tipu boot liu hanesan oho malu iha Munisípiu Likisá ne’ebé rezulta ema na’in-tolu mate hanesan Xefe Aldeia Metir, suspeitu nia espoza ho Bebe ida iha inan nia kabun laran, kazu tara-an iha Munisípiu Baukau ne’e vítima feto ida ho idade 18, kazu tara-an mós iha Munisípiu Manufahi ne’e vítima feto ida ho idade 15, hetan sidadaun mane ida ho inisiál A.LX.C iha otél Timing nia prosesu investigasaun la’o hela. Kazu hirak ne’e akontese iha semana ikus fulan-Novembru,” João Belo hateten liuhusi konferénsia imprensa ne’ebé hala’o iha salaun enkontru migrasaun Ministériu Interior, Vila-Verde, ohin.
Nia dehan, husi kazu hirak ne’ebé parte seguransa rejista ne’e iha kazu krime lima (5) mak ho tipu boot-liu.
Kazu boot ho tipu lima (5) mak hanesan violénsia doméstika hamutuk 16, asalta malu hamutuk 18, disturbasaun jerál hamutuk haat (4), burla agravadu hamutuk haat (4) no furtu hamutuk haat (4).
Superintendente Polísia ne’e argumenta, husi kazu hirak ne’e Munisípiu Dili mak rejista kazu barak-liu kompara ho munisípiu seluk.
Nia hatutan, kazu hirak ne’e PNTL submete hotu ona ba Ministériu Públiku hodi kontinua nia prosesu ba oin.
PNTL rejista asidente rodoviária 47
Aleinde ne’e, Portavós Komando Jerál Polísia Nasionál Timor-Leste (PNTL), Superintendente Polísia João Belo dos Reis, informa durante semana ikus iha fulan-Novembru ne’e parte seguransa rejista asidente rodoviária hamutuk 47.
“Durante semana ida-nia laran, iha semana ikus fulan-Novembru nian, PNTL liuhusi Unidade Tránzitu rejista asidente rodoviária hamutuk 47, husi totál ne’e inklu munsípiu sira hotu no Dili,” João Belo hateten.
Nia dehan, husi asidente hirak ne’e rezulta ema kanek kmaan hamutuk 65, kanek todan hamutuk 10 no lakon vida hamutuk haat (4).
Infrasaun no multa
Entretantu, kona-ba infrasaun no multa nian, Polísia Tránzitu no seguransa rodoviária halo pasa revista ba movimentasaun transporte sira hotu ne’ebé halo movimentu ba mai iha teritoriu hotu no deteta katak transporte barak mak sei kontra regulamentu Tránzitu nian.
“PNTL deteta katak transporte ne’ebé sidadaun sira utiliza barak mak sei halo infrasaun hodi viola kodigu estrada, nune’e operasaun sira-ne’ebé Polísia Tránzitu halo konsege deteta infrasaun sira hanesan transporte Governu laiha, transporte privadu hamutuk 158, transporte públiku hamutuk 16. Husi transporte hirak ne’e 81 mak laiha dokumentu no Polísia prende hodi prosesu tuir lei ne’ebé iha,” nia relata.
Husi totál infrasaun ne’ebé iha, Munsípiu Dili mak komete barak liu hamutuk 133, Baucau komete infrasaun hamutuk 40, Ermera komete infrasaun hamutuk 36, Kovalima komete infrasaun hamutuk 31 no Aileu komete infrasaun hamutuk 15, enkuantu Munisípiu seluk la rejista infrasaun.
Reseita husi infrasaun
Husi infrasaun ne’ebé iha multa ba infratór sira-ne’ebé viola kódigu estrada durante semana ida iha fulan-Novembru nia rohan, hatama reseita ba kofre Estadu hamutuk $820.00.
Jornalista : Hortencio Sanchez
Editór : Cancio Ximenes
