DILI, 19 Janeiru 2026 (TATOLI)—Diretór Jerál Sekretariadu Tékniku Administrasaun Eleitorál (STAE), Elviro Fernandes Moniz dehan preparasaun Eleisaun Prezidensiál iha 2027 ne’e STAE asegura pontu haat (4).
“Tanba tinan 2026 nu’udár tinan preparativu ba Eleisaun Prezidensiál 2027, nune’e medida ne’ebé STAE atu introdús iha 2026 maka dahuluk asegura no garante katak eleitór ne’ebé atinje idade 17 iha 2027 tenke resensiadu no no atualizadu. Daruak maka asegura no garante sentru votasaun hotu identifikadu. Datoluk, asegura no garante katak enkuadramentu legál sira armonizadu. Dahaat mak atu asegura no garante katak materiál lojístiku eleitorál sira-ne’ebé mak nesesáriu ba iha eleisaun 2027 disponibilizadu no ikus mak asegura no garante katak funsionáriu STAE hotu kapasitadu iha materiál eleisaun nian,” nia dehan via telefónika ba TATOLI, Segunda ne’e.
Notísia relevante: STAE introdús ona kartaun biométriku ba eleitór 309.913
Responsavel ne’e hatutan STAE hala’o preparasaun ba planu atividade durante tinan 2026, prepara kalendáriu resensiamentu eleitorál no atualizasaun baze dadus iha nivel postu administrativu no diáspora.
Aleinde ne’e, STAE mós prepara planu ba prosesu rekrutamentu ba iha operadór sistema, asistente no pontu vogál ne’ebé sei servisu iha postu administrativu hodi halo atendimentu resensiamentu eleitorál no atualizasaun baze dadus.
“Iha 2026 alvu ne’ebé STAE hakarak atinje maka eleitór hotu-hotu atualizadu ho sistema biométriku. Tanba ne’e maka STAE sei implementa resensiamentu eleitorál no atualizasaun baze dadus ne’e sei permanese iha postu administrativu durante períodu fulan sia (9). Nune’e, 2027 bele aplika ho kartaun biométriku. Maibé, kona-ba asuntu ida-ne’e presiza regula iha enkuardamentu legál,” Elviro esplika.
Alokasaun Orsamentu Jerál Estadu (OJE) ba STAE 2026 hamutuk $2.338.493, ne’ebé fahe ba saláriu no vensimentu $1.613,832, bens no servisu $674.661 no kapitál menór $50.000.
Entretantu, nia dehan, ligasaun kona-ba armonizasaun enkuadramentu legál ba eleisaun 2027, STAE hahú tiha ona halo diskusaun ho tékniku kona-ba pratika di’ak iha organizasaun prosesu eleisaun prezidensiál no resensiamentu eleitorál.
“Dokumentu hirak-ne’e sei submete ba Ministériu Administrasaun Estatál atubele konsidera karik atu halo alterasaun ba iha lei Eleisaun Prezidensiál no dekretu sira,” nia dehan.
Jornalista: Osória Marques
Editór: Xisto Freitas da Piedade
