VIKEKE, 25 Marsu 2026 (TATOLI)—Servisu Ministériu Obra Públika (MOP) Munisípiu Vikeke hamutuk ho autoridade lokál Postu Administrativu Ossú, Kuarta ne’e, inaugura estrada rurál pakote rua kilómetru haat (4) husi Suku Builó liga bá Suku Nahareka.
Iha serimónia inaugurasaun ne’e, Diretór SMOP Munisípiu Vikeke, Cirílio S. Gomes, esplika estrada rurál ne’ebé implementa iha Postu Ossú pakote rua ne’ebé empreza Lamadae Konstrusaun Unipessoal, Lda no empreza Marques Unipessoal, Lda implementa iha tinan 2023, konklui ona obra hamutuk kilómetru haat, iha-ne’ebé kada empreza responsabiliza kilómetru rua.
“Ita-nia projetu reabilitasaun ba estrada rurál kilómetru haat mak daudaun ne’e progresu fíziku atinje ona 100%, maibé projetu ne’e sei tama ba períodu retensaun 10% ho durasaun fulan-neen (6) ne’ebé empreza rua mak sei responsabiliza períodu. Karik aat ruma sira sei hadi’a. Nune’e, ba estrada ida-ne’e sei fasilita movimentu komunidade sira-nian husi Suku Builó, Nahareka, Uaibobo,” Cirílio ba jornalista sira iha Suku Builó, Kuarta ne’e.
Diretór SMOP Munisípiu Vikeke ne’e hatutan empreza rua ne’e hala’o reabilitasaun durante tinan haat (4), tanba kestaun klima udan mak sai difikulta ba empreza sira halo sira-nia servisu.
“Maski empreza sira hasoru dezafiu, maibé empreza sira hatudu sira-nia vontade servisu hodi konsege konklui obra referida. Obra ida-ne’e rasik ita-nia povu mak sei sente ninia benefísiu sira tanba sira mak sei utiliza,” nia akresenta.
Iha biban ne’e, Xefe Suku Builó, Helio Xemenes de Ferreira, haktuir durante tinan barak estrada ida-ne’e difikulta komunidade lori sai produtu lokál bá merkadu, maibé Governu iha hanoin rezolve ona povu nia problema ba estrada hodi fasilita komunidade nia movimentu.
“Ami-nia estrada durante ne’e sai difikulta ba ami, maibé problema ne’e governu solusiona ona. Tan ne’e, ami husu agradese ba Governu tanba konstrui ona estrada ba ami hodi fasilita ona ami-nia movimentu no fasilita tebes komunidade sira lori sira-nia produtu lokál sira bá merkadu”. Nia hato’o.
Iha oportunidade ne’e reprezenta komunidade Builó, Antonio da Silva, sente kontente tanba kondisaun estrada di’ak ona, fasilita ona populasaun sira-nia movimentu sira entre suku ba postu no munisípiu.
“Ami sente kontente no agadese ba Governu tanba ami-nia estrada kilómetru haat maka agora daudaun kondisaun di’ak. Ita kompara tempu uluk estrada iha tempu udan tau mak nakonu, maibé agora cor hotu ona beton, entaun la difikulta ona ami iha tempu udan. Fasilita tebes ona ami lori ami-nia produtu lokál ba merkadu,” nia subliña.
Entretantu, projetu estrada rurál pakote rua ho totál kilómetru haat iha-ne’ebé kada pakote gastu orsamentu hamutuk $471.641,93.
Partisipa iha serimónia inaugurasaun estrada rurál pakote rua ne’e kompostu husi MOP Munisípiu Vikeke no nasionál, autoridade lokál, veteranu, estudante, polísia eskuadra Ossú, diretór empreza sira, estudante no komunidade husi Suku Builó no Nahareka.
Jornalista: Vitorino Lopes da Costa
Editór: Xisto Freitas da Piedade
