OEKUSI, 26 Marsu 2026 (TATOLI) – Uma-kain 151 sai vítima ba inundasaun hafoin akontese udan boot durante loron tolu, hahú husi loron 24 to’o 26 Marsu 2026 ne’e, Komandante Autoridade Protesaun Sívil (APC) Rejiaun Administrativa Espesiál Oekusi Ambeno (APC), João Sila, fó-sai, relata.
Vítima uma-kain 151 ne’e, tuir João Sila, afeta maioria ba suku haat perténsia sub-rejiaun Pante Makasar, hanesan suku Cunha, Lalisuk, Bobokase no suku Naimeko.
“Dezastre ne’ebé akontese husi 24 to’o ohin 26 Marsu, dadus iha mudansa tuir tempu, atuál ita rekolla ona vítima dezatre naturál hamutuk 151, afeta ho tipu dezastre maioria bee tama uma, hanesan inundasaun,” Komandante APC Oekusi, João Sila iha suku Cunha dehan, ohin.
Notísia relevante:Inundasaun iha Bobokase, Autoridade RAEOA sei hadi’a barajen Tono
Autoridade ne’e informa, vítima 151 ne’e afeta direita ba suku haat iha sub-rejiaun Pante Makasar, hanesan suku Cunha, Lalisuk, Bobokase no suku Naimeko. “Vítima hirak-ne’e identifikadu no apoia ona emerjénsia hanesan ai-han no la’ós ai-han ba vítima 88, falta uma-kain 63, mak sei apoia iha loron tuir mai,” nia reforsa.
Líder másimu APC Oekusi ne’e énfaze, husi vítima 151 ne’e, APC seidauk identifika kona-ba tipu kazu, aat kaman, aat naton no aat totál, maibé rekolla jeralmente de’it, tanba prioridade husi APC responde uluk, vítima ho pakote emerjénsia hanesan food item no non-food item.
“Nune’e ita bele aselera vítima umanu nian, depois mak APC kontinua deteta no observa katak, ida-ne’ebé tama kategória aat kaman, aat naton no aat totál, atu submete dadus ba nasionál atu hetan materiál rekuperasaun,” nia hateten.
Notísia relevante:SEPS apoia ekipamentu informátiku no mobiliáriu haforsa serbisu APC Oekusi
Cristiano da Costa nu’udar vítima inundasaun husi suku Cunha, afirma, kauza prinsipál akontese inundasaun iha suku Lalisuk no suku Cunha, mai husi mota no laiha bee-dalan.
Tanba ne’e nia rekomenda ba Governu atu bele konstrui gabiaun protesaun no bee-dalan, tanba inundasaun ne’e akontese beibeik iha kada tinan.
“Mota ona ne’e Governu tenke konstrui gabiaun atu seguru, depois estrada iha uma oin presiza tau bee-dalan, nune’e bee halai tuir nia dalan, ne’e mak husu ba Governu atu tau matan ba mota-oan konstrui gabiaun no bee-dalan,” nia rekomenda.
Notísia relevante:Janeiru 2026, APC Oekusi rejista dezastre naturál 12 maioria anin sobu uma
Entretantu, Autoridade Protesaun Sívil apoia ona ai-han emerjénsia hanesan foos, supermie, masin-midar, no seluk-tan, no la’ós ai-han mak sasán koziña nian hanesan lona, bikan, kanuru balde no seluktan.
Jornalista: Abílio Elo Nini
Editór: Rafael Ximenes de A. Belo
