BOBONARU, 30 Marsu 2026 (TATOLI) – Koordenador Infrestrutura Ministériu Obras Públika (MOP) munisípiu Bobonaru, Fernando de Fátima, sei orienta ekipa téknika bá terrenu hodi halo levantamentu dadus atu rezolve problema estrada ne’ebé kotu iha área suku Maleubu, postu administrativu Bobonaru.
Estrada ne’e kotu tanba rai-halai kauza husi udan-boot iha loron 28 Marsu, no movimentasaun públiku entre postu administrativu Bobonaru no Atsabe, munisípiu Ermera paradu.
Komunidade sira husu intervensaun imediata husi Governu no Institutu Jestaun Ekipamentu no Apoia Dezenvolvimentu Infraestrutura (IGEADI), tanbe ne’e afeta ekonomia, transporta sasán, no saúde.
MOP munisípiu Bobonaru konfirma katak sei toma atensaun ba problema estrada ne’e. “Ekipa sei bá haree”, Fernando de Fátima informa ba jornalista via WhatsApp, ohin.
Notísia relevante: Estrada ligasaun Bobonaru-Ermera iha área Maleubu kotu totál
Negosiante husi suku Tebabui, Olandino Alves, dehan atu viajen bá-mai ladi’ak, tanba estrada kotu no sira selu ema mak dudu motór no leba pasta.
Membru komunidade suku Kolimau, Feliz Franculino, afirma katak problema ne’e afeta ba aktividade oioin. “Kuandu estrada kotu hanesan ne’e ami-nia movimentu la la’o. Ami husu ba Governu atu tau-atensaun, tanba ne’e hamate ona ami-nia negósu. Husi Kolimau atu bá Maliana presiza duni estrada”, nia salienta.
Xefe suku Maleubu, Quintiliano Barros, relata katak tinan bainhira udan estrada no ponte ne’e sempre kotu no komunidade sira hola inisiativa hadi’ak rasik, maibé tinan ida-ne’e labele rezolve ho serbisu manuál. “IGEADI mak bele mai rezolve”, nia dehan.
Quintiliano subliña katak dezastre naturál ne’e aleinde estrada kotu fó ameasa mós ba komunidade ne’ebé hela iha foho-lolon.
Lembra katak Ministru Planeamentu Estratéjiku no Investimentu, Gastão Sousa, relata katak estrada trosu husi suku Lourba, postu administrativu Bobonaru, liga bá postu Atsabe, munisípiu Ermera, sei selebra kontratu iha tempu badak ho empreza Shanghai Construction Group Co.Ltd., ho valor orsamentu millaun $43.199.259,51 no distánsia kilómetru 48,93.
Notísia relevante: Estrada Kailaku-Lolotoe iha faze aprovizionamentu finál, Lourba-Atsabe hein implementasaun
Jornalista: Sergio da Cruz
Editora: Maria Auxiliadora
