KOVALIMA , 10 Abril 2026 (TATOLI) – Servisu Munisipál Asaun Sosiál (SMAS), iha trimestre dahuluk (Janeiru to’o Marsu) 2026 fó ona apoia kaixaun hamutuk 51 ba família matebian ne’ebé konsidera vulneravél iha munisípiu Kovalima.
Diretór Servisu Munisipál Asaun Sosial (SMAS), Clementino Bere, relata, durante fulan-tolu ne’e, autoridade Kovalima liuhosi SMAS fó apoiu ona kaixaun ba família matebian vulneravél sira bazeia ba pedidu husi xefe suku sira iha postu administrativu hitu ne’ebé partensia iha munisípiu Kovalima ninian.
“Ita tama ona iha trimestre dahuluk nune’e bazeia ba dadus ne’ebé iha ami apoiu ona kaixaun hamutuk 51 ba família matebian vulneravél ne’ebé mak submete sira-nia pedidu ba ami hodi husu atu fó apoiu kaixaun,” nia relata dadus ne’e ba TATOLI, iha Bairu Kosta ohin.
Tuir kritéria bainhira família matebian ida atu husu apoia kaixaun hosi servisu sosiál munisípiu ninian, nia hateten, dahuluk família tenke lori karta deklarasaun husi xefe suku no mós kopia kartaun eleitorál matebian ninian.
Tuir relatóriu totál kaixaun ne’e, nia dehan kaixaun ho medida boot hamutuk 45 no kiik haat no mós medida naton rua ne’ebé sosa ho orsamentu jerál Estadu 2026 alokadu ba Servisu Munisipál Asaun Sosiál ho orsamentu rihun $ 50 hosi totál orsamentu $ 151,428 no oras ne’e daudaun gasta ona orsamentu $8,080 no sei restu $ 41,920.
Jornalista: Celestina Teles
Editór:Florencio Miranda Ximenes
