DILI, 18 Abríl 2026 (TATOLI)-Komadante Unidade Polísia Marítima, Superintendente Xefe Polísia, Eugénio Pereira, fó-sai katak, ohin Komandu Munisípiu Lautein sei lori tripulante 32 ne’ebé halo atividade peska ilegál iha munisípiu Vikeke ba aprezenta iha Ministériu Públiku (MP) Baukau.
Nia hateten, tripulante sira-ne’e kaptura liuhusi operasaun no vijilánsia iha tasi kosta súl Uatukarbau, munisipiu Vikeke, ne’ebé halo atividade ilegál kaer ikan tonelada sia to’o sanulu.
Nia esplika, hafoin kaer suspeitu sira ne’e, dezde horisehik UPM hahú halo koordenasaun ho Komandu Munisípiu Lautein
Husi UPM nia parte investigasaun ninian mak aprosima ona, ne’ebé sai hanesan autór ba prosesu hodi halo koordenasaun no nia prosesu ne’e ba iha prokurador ka ministériu públiku.
“Ne’ebé daudaun prosesu hotu sira mak asegura ohin duni, ha’u halo ona komfirmasaun ho ha’u-nia xefe operasaun Unidade Polísia Marítima ninian informa katak ohin sira sei lori suspeitu sira ba aprezenta iha Ministériu Públiku Baukau”, Eugénio Pereira, ba Tatoli lihuhosi telefónika, Sábadu ne’e.
Nia dehan, ohin aprezenta ba Ministériu Públika sira-nia parte hotu ona, agora ida-ne’e parte justisa nian, maibé nafatin kontribui tanba objetu krime iha tasi-laran entaun kestaun seguransa nafatin hamutuk ho Komandu Munisípiu Lautein oinsá atu asegura evidénsia sira.
“Nune’e atu evidénsia sira-ne’e nafatin iha ami ámbitu seguru to’o prosesu desizaun tún oinsá”, nia dehan.
Tuir nia, ró ne’ebé tahan agora para hela iha portu Com Lautein nian.
“Maske ró ita kaer ona maibé ami nafatin halo vijilánsia no kontinua serbisu hamutuk ho ita-nia komunidade sira nune’e sira nafatin hato’o informasaun ba iha komandu PNTL Lautein buat ruma sira-nia orientasaun iha terrenu ne’e bele atua lalais situasaun sira, liuliu atividade ilegál sira”, nia subliña.
Notisía relevante: Operasaun UPM iha tasi Timor kaptura tripulante 32 ho ikan tonelada sia
Journalista: Arminda Fonseca
Editór: Evaristo Soares Martins
