DILI, 28 Abríl 2026 (TATOLI) – Folin kombustivel husi postu abastesimentu sira iha munisípiu hothotu, inklui Rejiaun Administrativa Espesiál Oekusi Ambenu (RAEOA) mantein tuir presu ne’ebé Governu deside katak ba gazolina $1.50 no gazóleu $1.65.
Enkuantu iha postu abastesimentu Queybubun Laco Combustiveis Unipessoal, iha Bobonaru, fa’an ho presu normál ba gazolina $1.25 no gazóleu $1.30.
Tuir dadus husi Autoridade Nasionál Petróleu (ANP), entre loron 22 no 27 Abríl, sentru abastesimentu tolu iha Aileu fa’an mina ho folin hahú husi $1.45 to’o $1.49 no gazóleu husi $1.53 to’o $1.65. Iha Ainaru, iha postu kombustivel ida ne’ebé fa’an gazolina $1.50 no gazóleu $1.65, munisípiu Baukau iha sentru kombustivel 12, fa’an gazolina hahú husi $1.40 to’o $1.50, no gazóleu husi $1.48 to’o $1.65.
Munisípiu Bobonaru iha postu neen no fa’an gazolina husi $1.25 to’o $1.50, no gazóleu husi $1.30 to’o $1.65. Kovalima iha estasaun kombustivel rua, presu husi $1.48 to’o $1.50 ba gazolina, no gazóleu husi $1.63 to’o $1.65. Dili iha sentru abastesimentu 30, ne’ebé fa’an gazolina hahú husi $1.34 to’o $1.50 no gazóleu husi $1.55 to’o $1.65. Ermera iha postu tolu, gazolina ho presu $1.33 to’o $1.40, no gazóleu husi $1.45 to’o $1.51.
Munisípiu Lautein iha sentru tolu, folin gazolina $1.45 to’o $1.50 no gazóleu husi $1.50 to’o $1.60. Likisá sentru kombustivel hamutuk ualu no fa’an gazolina $1.45 to’o $1.49 no gazóleu husi $1.55 to’o $1.65.
Munisípiu Manatutu iha sentru abastesimentu tolu, fa’an gazolina husi $1,45 to’o $1,49 no gazóleu husi $1.55 to’o $1.56. Manufahi iha sentru abastesimentu rua ho folin gazolina $1.50 no gazóleu $1.62 to’o $1.65.
Iha Oekusi, sentru abastesimentu tolu, fa’an gazolina ho folin husi $1.45 to’o $1.50, gazóleu $1.55 to’o $1.65. Vikeke iha sentru neen, fa’an gazolina hahú husi $1.43 to’o $1.50, no gazóleu husi $1.55 to’o $1.65.
Notísia relevante: Folin kombustível sentru abastesimentu estavel maibé retallista fa’an dalan-ninin aumentu signifikativu – ANP
Jornalista: Arminda Fonseca
Editora: Maria Auxiliadora
