DILI, 11 Maiu 2026 (TATOLI)—Xefe Estadu Maior Jenerál FALINTIL-Forsa Defeza Timor-Leste (F-FDTL), Tenente Jenerál Falur Rate Laek, sei foti medida preventiva hasoru oknum membru F-FDTL ne’ebé suspeitadu ba kazu omesidiu iha Aldeia Poros, Suku Mehara, Postu Administrativu Tutuala, Munisipiu Lautein iha Domingu (10/5) tuku 01h30 hodi hein prosesu tuir mai.
Notísia Relevante: Kazu omesídiu iha Poros, PNTL detein suspeitu na’in-10
Tenente Jenerál Falur Rate Laek hateten, kona-ba kazu omisídiu ne’e nia hetan ona informasaun maibé kona-ba kauza loloos ka relatóriu ofisiál ne’e nia parte seidauk simu, maibé se krime ona katak militár mak kulpadu ka kriminozu entaun prosesa tuir lei ka justisa mak sei responde.
“Tanba ne’e fó parabéns ba ekipa PNTL tanba la to’o oras 24 nia laran sira asegura ona, nune’e husi parte F-FDTL nian sei la’o tuir medida ne’ebé prosesu iha lei, depois mak ami halo ami-nia prosesu administrativa,” Tenente Jenerál F-FDTL informa ba jornalista sira iha rezidénsia eis titulár Taur Matan Ruak, Faról, ohin.
Nia hatutan, prosesu investigasaun sei investiga dahuluk ba membru F-FDTL nia komandante, katak oknum ne’e husi komponente ne’ebé, hafoin loos ona foin bele prosesu to’o nasionál.
“Enkuantu iha justisa hatudu katak sala prosesu dahuluk mak sei hasai nia husi F-FDTL, hafoin nia tama kadeia, loron serteza seidauk iha tanba kazu ne’e foin akontese signifika sei iha proseu barak mak tenke emite,” nia esplika.
Nia hatutan, ema moris sempre iha sala laiha ida mak perfeitu maibé bainhira nia halo sala la’ós envolve hotu instutisaun, tanba iha instituisaun ida refere ema barak la’ós nia mesak. Ai-fuan ne’e ida mak aat, la’ós ai-fuan hotu-hotu aat,” nia dehan.
Notísia Relevante: PNTL detein membru F-FDTL ida suspeitadu ba kazu omisídiu iha Poros
Jornalista : Alexandra da Costa
Editór : Cancio Ximenes
