DILI, 29 Maiu 2026 (TATOLI)–Tribunál Judisiál Primeira Instánsia Dili (TJPID), Sesta ne’e, hahú halo prosesu tentativa konsilasaun ba kazu danu morais ka hadi’a naran di’ak, ne’ebé envolve husi Reu Luciano Valentim Conçeicão ‘Timor Maubere’ hasoru Autór Sérgio Paulo Dias Quintas.
Autór Sergio Quintas hatama prosesu tanba sente prejudikadu no afetadu bainhira Timor Maubere ko’alia nia iha públiku liuhusi mídia, katak Sérgio Quintas ne’e nu’udar maupagadór, invezadór no manipuladór tanba koko atu halo distorsaun ba istória Masakre Muapitine, ne’ebé akontese iha tinan 1983, ne’ebé Autór hakerek iha livru Raja Viríssimo Dias Quintas ‘Saya Mati untuk kemerdekaan’.
Iha sala julgamentu, Juíz ne’ebé prezide kazu ne’e, João Ribeiro, husu ba parte Reu Timor Maubere atu husu deskupa ba Autór Sérgio Dias Quintas, atu dada fali nia liafuan ne’ebé hasai ona, atu nune’e ba futuru bele kria fali relasaun di’ak entre parte rua.
Iha audiénsia julgamentu, Juíz João Ribeiro realsa katak, tanba iha prosesu ida-ne’e Reu no Autór iha relasaun família tanba iha tentativa konsilasaun ne’e, Tribunál la buka sé mak loos no sé mak sala, maibé atu buka solusaun ba parte rua hodi armoniza relasaun hodi hamate efeitu sira ne’ebé iha atu parte família rua ne’e labele iha tan problema.
Nune’e, Tribunál fó prazu loron-10 atu Reu no Autór buka malu buka hodi hetan solusaun liuhusi akordu ida hodi aprezenta ba Tribunál, se lae mak Tribunál sei avansa ba julgamentu tanba ein prinsípiu bainhira hakat ba prosesu sivíl mak parte rua la simu malu no iha tentativa konsiliasaun, maka automátikamente Tribunál tenke buka solusaun.
Notísia relevante : Tribunál notifika Luciano Timor Maubere hodi hatan keixa Sergio Quintas
Iha sala julgamentu, Autór Sérgio Quintas, hateten, prosesu ne’e kontra Luciano tanba duun nia maupagadór, invezadór no manipuladór, tanba ne’e nia hatama prosesu hodi kontra Luciano.
Nia konsidera, Luciano nia aktu ne’e afeta tebes ba nia ondra no naran di’ak, tanba ne’e, nia husu ba parte Luciano atu husu diskupa iha mídia hodi rekoñese nia sala ba liafuan sira ne’ebé nia hasai.
“Atu review livru ne’e fasil hela. Señor Luciano hato’o ona, keixa kona-ba livru no iha momentu ne’e Luciano hateten ha’u hanesan manipuladór no invezadór. Ha’u bele perdua maibé saida mak bele fó ha’u tanba ha’u-nia laran moras,” Quintas akresenta.
Biban ne’e mós, nia husu ba Luciano atu husu deskulpa ba mídia no dada fila nia liafuan.
Luciano Timor Maubere liuhusi mandatáriu Pedro Aparício, hateten, prosesu sira ne’e mós tanba nia kauza Autór nia livru ne’ebé nia rasik hakerek.
Pedro Aparicio, hateten, iha prosesu tentativa konsilasaun ne’e Tribunál hamutuk ho Autór no Reu buka solusaun.
“Parte Reu halo ida-ne’e tanba la satisfaz ho livru ne’ebé Autór hakerek. Tanba ne’e, hafoin ha’u konsulta ho Reu no hakarak husu ba Autór livru ne’e atu halo review ba livru,” nia katak.
Pedro Aparício iha sala julgamentu hateten, nia konkorda atu parte rua kaer liman iha Tribunál hodi husu deskulpa pesoalmente, maibé atu husu deskulpa iha públiku ne’e labele.
“Proposta ne’e simples mas todan ba ami-nia kliente. Tanba iha kazu ne’e reprezenta ba interrese komún,” nia reforsa.
Hafoin Tribunál rona tiha parte hotu, Tribunál desde hodi fó prazu loron-15 ba parte rua hodi buka malu hodi solusiona problema.
Prosesu tentativa konsilasaun ne’ebé prezide husi Juíz João Ribeiro, Autór Sérgio Quintas reprezenta husi Defensór Públiku Humberto Amaral no Reu reprezenta husi Advogadu Privadu Pedro Aparício.
Jornalista : Natalino Costa
Editora : Julia Chatarina
