DILI, 01 Juñu 2026 (TATOLI)—Ministru Defeza, Kontra Almirante Donaciano do Rosário Gomes ‘Pedro Klamar Fuik’ no Ministru Defeza Angola, João Ernesto dos Santos, Segunda ne’e, hasoru malu hodi diskute kona-ba revizaun kooperasaun militár.
Ministru João Ernesto to’o orsehik iha Dili hodi partisipa iha reuniaun Ministru Defeza Komunidade Paíz Lian Portugéz (CPLP, sigla portugéz) ba dala-25 inklui diálogu ho Forsa Armada Timor-Leste.
“Iha enkontru ohin, ami ko’alia kona-ba halo revizaun ba akordu kooperasaun ne’ebé iha ona, tanba tempu liu ona. Ita hotu hatene dinámika moris nomós situasaun jeopolítika internasionál ne’ebé muda hela. Nune’e, ami iha obrigasaun atu aserta ami-nia pasu atu nune’e labele husik ami iha kotuk,” Ministru João Ernesto, hato’o ba Jornalista sira hafoin enkontru iha iha sala enkontru bilaterál Ministériu Defeza, Fatuhada.
Notísia relevante : Ministériu Defeza fortifika kooperasaun militár ho Austrália
Nia dehan, iha akordu kuadru kooperasaun militár entre Angola no Timor-Leste define fali buat sira ne’ebé presiza atu hadi’a.
“Hafoin ne’e, pasa ba implementasaun atu di’ak ba ami-nia povu, ami-nia integridade territoriál, no ba komunidade ne’ebé ko’alia lian portugéz,” nia akresenta.
Iha sorin seluk, Ministru Defeza, Kontra Almirante Donaciano do Rosário Gomes ‘Pedro Klamar Fuik’ hato’o nia protidaun atu kontinua haforsa kooperasaun militár ho Timor-Leste.
“Angola hanesan país amigu, país irmaun iha ita-nia istória independénsia iha pasadu sempre hamutuk ho ita, tulun ita depois independénsia mós sempre hamutuk ho ita, tulun ita fó apoiu estabelese kooperasaun ba dezenvolvimentu ba Forsa Armada,” Ministru dehan.
Aleinde ne’e, parte rua diskute mós kona-ba renovasaun portofoliu kuadru kooperasaun Angola no Timor-Leste ne’ebé iha ona.
“Haree filafali mós portofoliu relasiona ho kooperasaun ne’ebé mak sei haree, sei asina iha tempu badak ba kooperasaun entre entre rai rua entre Timor-Leste no Angola,” nia tenik.
Jornalista : Natalino Costa
Editora : Julia Chatarina
