BOBONARU, 22 Juñu 2026 (TATOLI) – Autoridade Munisípiu Bobonaru hato’o sentimentu tristeza kle’an ba falesimentu eis-Prezidente Repúblika, Francisco Guterres “Lú Olo”, no husu populasaun atu hakmatek durante lutu nasionál loron hitu ne’ebé Governu dekreta ona.
Prezidente Autoridade Munisípiu Bobonaru, Paulo Moniz Maia, dehan Lú Olo hanesan figura importante ida iha luta ba libertasaun no dezenvolvimentu Estadu Timor-Leste. Ho matebian nia mate reprezenta lakon boot ida ba timoroan tomak, tanba durante tinan 24 iha tempu luta armada, Lú Olo kontribui barak iha rezisténsia hasoru invazaun indonézia.
Notísia relevante: Líder istóriku Lú-Olo hakotu nia peregrinasaun iha Ospitál Malázia
“Lú Olo la’ós de’it líder ida ba família, maibé figura nasional ida ne’ebé kontribui ho nia hanoin no servisu ba dezenvolvimentu nasaun. Timoroan tomak sente lakon figura ida ke kontribui ideia ba ita-nia dezenvolvimentu nasaun. Destinu ita ema la hatene, só maromak mak hatene. Ema hotu-hotu sei mate, ita husu boot ba Aman Maromak atu simu ita-nia tiu, maun, aman Fransisco Guterres Lú Olo iha maromak nia kadunan santu”, nia hato’o ba jornalista sira, segunda-feira ne’e.
Iha momentu ida-ne’e, Paulo Moniz Maia lori povu Bobonaru nia naran hato’o kondolénsia profunda ba família enlutada, liuliu ba feen no oan-ki’ak sira. Nia mós husu ba komunidade tomak atu respeita períodu lutu nasional no mantein dame durante momentu ne’e.
“Ita tenke silénsiu. Ita fanátiku ba nasaun oioin iha kopa mundiál, halo komboiu sein autorizasaun husi parte seguransa nia, labele naran la’o, movimentu, perturba ema seluk nia movimentu, ema hakarak hakmatek, balun moras”, nia dehan.
Iha parte seluk, Prezidente Konsellu Munisipál Kombatente Libertasaun Nasionál Bobonaru, António Lema Bere “Laobalu”, hateten katak komunidade veteranu no gerilleiru sira sente triste tanba lakon líder nasional ida ne’ebé durante luta ba libertasaun no orienta kombatente sira iha ai-laran.
Maski Lú Olo lakon ona nia isin, maibé nia kontribuisaun no memória sei hela nafatin iha istória Timor-Leste no sai inspirasaun ba jerasaun foun sira “Ami gerilleiru sira sente laran moras tanba lakon maun-boot ida. Maibé, nia legadu sei hela nafatin atu sai matadalan ba joven sira no ba dezenvolvimentu nasaun iha futuru”, Laobalu dehan.
Konsellu Kombatentes Bobonaru sei hein orientasaun husi nasionál kona-ba programa omenajen no atividade sira durante períodu lutu. Hanesan sinál respeitu ba líder nasionál ne’e, Leobalu dehan Konsellu Munisipál Kombatente Libertasaun Nasionál Bobonaru hasa’e bandeira meia-aste iha edifísiu oin.
Tuir observasun jornalista Tatoli, edifísiu Estadu no organizasaun naun-governamentál sira hasa’e bandeira meia-aste hodi fó omenajen ba líder nasionál ne’e nia falesimentu.
Notisía relevante: Matan Ruak manifesta sentidu triste ba falesimentu eis-Xefe Estadu Francisco Guterres Lú-Olo
Jornalista: Sergio da Cruz
Editora: Maria Auxiliadora
