OEKUSI, 25 Juñu 2026 (TATOLI) – Diresaun Serbisu Edukasaun Oekusi, fasilita formasaun ba manorin sira husi Edukasaaun Pré-Eskolár (EPE) 13 iha Rejiaun Administrativa Espesiál Oekusi Ambeno (RAEOA) kona-ba literásia no numerásia.
Notísia relevante:ME prioriza literasia no numerasia iha tinan 2025
Koordenadór Formasaun iha Diresaun Serbisu Rejionál Edukasaun Oekusi, Jacinto Elo, informa, polítika formasaun ne’e mai husi Ministériu Edukasaun, hodi fasilita manorin sira iha Edukasaun Pré-Eskolár 13.
“Programa ne’e mai husi Ministériu Edukasaun, atu kapasita manorin sira, kona-ba literásia no numerásia ba manorin sira iha Edukasaun Pré-Eskolár 13, liga liu ba ita-nia persentajén foin daudaun liuhusi teste prova iha ensinu bázika sei mínimu, tenke hasa’e tan kapasidade ba manorin sira, oinsá bele prátika no implementa iha eskola idak-idak,” nia hateten ba jornalista iha salaun edukasaun Oekusi, ohin.
Nia hateten, formasaun ne’e hala’o durante semana ida, ba de’it Edukasaun Pré-Eskolár sira, tanba antes ne’e primeiru siklu hetan ona formasaun hafoin ezame primeiru períodu.
“Ita tenke fó nafatin refresh training ba manorin sira atu hadi’a nafatin sira koñesimentu no metrolojia iha sala laran oinsá atu hanorin, tanba manorin iha edukasaun pré-eskolár ne’e, lahanesan ho ensinu báziku nian tanba karaterístika alunu lahanesan,” nia hateten.
Notísia relevante:Edukasaun Oekusi hahú prova finál ba estudante sextu anu ho literásia-numerásia
Dechi Deli Mala nu’udar formandu husi EPE Boboloa, sente orgullu tanba liuhusi kapasitasaun ne’e tulun tebes profesór sira bele hasa’e tan abilidade nu’udar manorin tanba Edukasaun Pré-Eskolár mak baze ba edukasaun.
“Formasaun literásia no númerasia kona-ba dalan komunikasaun no dalan koresaun nian, no metodu oinsa hanorin alunu sira maka dalan komunikasaun liliu konta istória hodi mentaliza labarik sira bele ko’alia konta sira-nia istória rasik, nune’e iha korajén atu bele aprende matéria eskola ne’ebé nia hetan no dalan korresaun nian maka lee no hakerek atu enkoraza alunu sira atu hakerek lé no sura ho loloos,” nia hateten.
Jornalista: Abílio Elo Nini
Editór: Rafael Ximenes de A. Belo
