OEKUSI, 14 Jullu 2026 (TATOLI) – Ministériu Administrasaun Estatál (MAE), liuhusi Diresaun Jerál Dezentralizasaun no Governu Lokál, tersa ne’e, introdús prosesu elaborasaun Planu Investimentu Rejionál (PIR) no Rejíme Jurídiku Aprovizionamentu (RJA) Planeiamentu Dezenvolvimentu Integradu Munisipál (PDIM) iha Rejiaun Administrativa Espesiál Oekusi Ambeno (RAEOA).
Inisiativa ne’e bazeia ba enkuadramentu legál Dekretu-Lei N.º 4/2014, loron 22 Janeiru ne’ebé regula PDIM, hamutuk ho Lei N.º 3/2014, loron 18 Juñu ne’ebé kria estatutu espesiál ba RAEOA, ho objetivu atu armoniza implementasaun polítika dezenvolvimentu lokál nian.
Diretór Jerál ba Dezentralizasaun no Governu Lokál, António Guterres, informa formasaun ne’e realiza tanba pedidu mai husi Autoridade RAEOA atu hasa’e koñesimentu ba Diretór Rejionál sira inklui funsionáriu sira hodi mellora prestasaun serbisu iha área iha planeamentu nian.
“Ami-nia prezensa iha Oekusi atu fasilita oinsá bele prepara planeiamentu ne’ebé di’ak, iha kontestu Timor-Leste, planeiamentu investimentu importante atu armónia planu nasionál no planu rejionál no suku 20 iha Oekusi, hodi asegura katak programa no projetu sira responde ba nesesidade povu nian, no kontribui ba dezenvolvimentu ekonómiku sosiál no ambientál iha maneira sustentavel,” nia hateten iha salaun Konvensaun Palaban Oekusi, ohin.
Nia hateten, Planeamentu Dezenvolvimentu Integradu Munisipál no investimentu rejionál maka prosesu planeiamentu ne’ebé integra setór hothotu, instituisaun no parte interresadu sira ba nesesidade povu nian, liuhusi konsultasaun no define prioridade hodi orienta dezenvolvimentu ida-ne’ebé korrente sustentavel no responsade ba nesesidade komunidade.
Notísia relevanteAjenda diskusaun PED Oekusi ba tinan lima sei hahú iha semana ne’e
Diretór Jerál ne’e esplika katak, objetivu husi PDIM ne’e atu halo dezenvolvimentu ne’ebé integradu entre setór ida no setór sira seluk. Estabelese investimentu no programa prioridade sira-ne’ebé akontese iha rejiaun. Garante utilizasaun rekursu ho efisiente no efetivu, promove koordenasaun entre Governu Sentrál ho rejionál suku no parsériu dezenvolvimentu sira iha nivél rejiaun. Hasa’e partisipasaun komunidade iha prosesu planeiamentu ne’ebé di’ak.
Aleinde ne’e mós iha prinsipíu ne’ebé ekipa MAE sei introdús durante kapasitasaun maka prinsipíu planeiamentu integradu no investimentu rejionál nian, kona-ba integrasaun sistema, mezmu RAEOA nia estatutu rejiaun espesiál maibé Orsamentu Jerál Estadu (OJE), sei fornese husi Governu Sentrál. Partisipasaun másimu mai husi entidade hotu, transparente ka nakloke ba serbisu hothotu ne’ebé iha.
“Maibé responsabilidade másimu ba planeiamentu implementasaun no aváliasaun monitorizasaun, sustentabilidade husi investimentu nia kontuinidade benefisíu direita ba povu, evidénsia no dadús maka baze ba desizaun no planeiamentu,” nia afirma.
Notísia relevanteRAEOA define pilár haat iha elaborasaun Planu Dezenvolvimentu Estratéjiku Rejionál
Prezidente Autoridade RAEOA, Régio da Cruz Salu, konsidera kapasitasaun ba dirijente sira iha RAEOA importante atu prepara ba elaborazaun Planu Estratéjiku Dezenvolvimentu Rejionál faze daruak nian.
“Formasaun ne’e ita maka husu tanba iha objetivu rua, primeiru ita iha obrigasaun atu halo Planu Estratéjiku Rejionál faze daruak ne’e maka ohin ita hahú ho formasaun ne’e atu ajusta no sinkroniza pensamentu ba preparasaun Planu Integradu Dezenvolvimentu Rejionál, ne’ebé bainhira formasaun finaliza iha hahú prosesu estabelesimentu ekipa integradu ida atu elabora tanba antes ne’e estabelese ona maibé mudansa estrutura entaun agora tenki halo fali revizaun tanba peszoál balu iha funsaun foun ona,”
Notísia relevanteReuniaun dahuluk Konsellu-Konsultivu RAEOA define prioridade haat
Entretantu antes ne’e, Autoridade RAEOA estabelese ona Grupu Serbisu Tékniku (GST) ba elaborasaun Planu Dezenvolvimentu Estratéjiku Rejionál ba tinan lima 2027-2031, ne’ebé define pilár importante haat ba asuntu ekonómia, sosiál, infraestrutura no boa-governasaun.
Jornalista: Abílio Elo Nini
Editór: Rafael Ximenes de A. Belo
