VIKEKE, 13 Abríl 2026 (TATOLI) – Komunidade suku tolu kompostu hosi suku Uma Ki’ik, Karaublu no suku Uaimori, postu administrativu Vikeke Vila kuaze tinan barak ona nafatin enfrenta problema bee-moos.
Reprezentante komuniade aldeia La’o, Paulino Soares Pinto hateten abitante 1,000 resin hosi suku tolu ne’e ne’e mak tinan barak ona la asesu ba bee-moos.
Nia dehan komunidade husi suku tolu ne’e so asesu de’it ba posu ida ne’ebé mak konstroi hosi Programa Nasionál Dezenvolvimentu Suku (PNDS).
“Bee posu ne’e iha fulan Agostu tenke maran. Tanba ne’e, bee-moos sai preokupasaun bo’ot ba ami”, Paulino Soares Pinto ba Tatoli,I.P, iha postu administrativu Vikeke Vila, ohin.
Nia dehan laiha dalan seluk, durante tempu bailoron, komunidade tenke ba mota hodi kuru bee ba nesesidade hanesan tein, hemu no seluk.
“Durante tempu bailoron komunidade tenke ba kuru bee iha mota. Ba komunidade sira ne’ebé iha motorizada pelumenus ajuda sira ba kuru bee. Maibé, ba ami ferik no katuas sira ne’e tenke obriga la’o ain dook mak foin hetan bee-moos,” Nia lamenta.
Paulino husu ba autoridade lokál no governu atu bele hatan ba preokupasaun ne’e no buka solusaun imediata hodi fasilita bee-moos ba komunidade.
Hatan ba preokupasan ne’e, Diretór Servisu Agua no Saneamentu Munisípal Vikeke, Guilhermino Gomes Soares, hateten antes ne’e ekipa husi Diresaun Servisu Munisipál Água no Saneamentu (SMASA) Vikeke halo ona levantamentu ba bee-matan sira iha área Pukalaran, maibé be’e matan mak menus.
“Ita la’ós haluha maibé bee-matan mak menus iha área Pukalaran. Tan ne’e, ita labele halo buat ruma tanba bazeia ba survey ne’ebé mak ita-nia ekipa halo ona, bee matan iha área Pukalaran mak la sufiseinte. Tanba ne’e mak ita labele dada bee-moos ba ita-nia komunidade sira,” Paulino esplika.
Nia hato’o katak ba oin SMASA sei nafatin koordena ho autoridade no komunidade sira hodi halo identifikasaun ba bee-matan ne’ebé ho kapasidade natoon atu bele halo kanalizasaun hodi fornese bee-moos komunidade.
Jornalista: Vitorino Lopes da Costa
Editór: Filomeno Martins
