MALIANA, 04 agostu 2023 (TATOLI) – Adjuntu Prezidente Autoridade Munisípiu Bobonaro, João de Fátima do Carmo, hateten feto sira iha Bobonaro laran tomak tenke brani foti desizaun atu kandidata-aan hodi kompete eleisaun suku ho mane sira.
Tuir nia, partisipasaun feto tenke iha atubele fó balansu ba igudade jéneru, tanba iha períodu sira antes no atuál lider komunitária kompostu hosi xefe suku no xefe aldeia sira maioria okupa hosi mane.
“Fó oportunidade, liuliu bá ita nia inan-feton sira ne’ebé poténsiá, feto sira ne’e mak hanoin di’ak bele fó tempu ba sira atu sira mós bele kandidata-aan ba iha lideransa komunitáriu, tanba ema hotu-hotu iha direitu atu kandidatu-aan iha eleisaun lider komunitária, ita hatene katak estadu direitu demokrátika nia fó ba ema hotu-hotu atubele hola parte,” nia ko’alia iua Maliana, sesta ne’e.
Lei suku númeru 9/2016, 08 jullu ho natureza jurídika asosiasaun públika no objetivu fundamentál hosi lei estabelese norma organizasaun, kompeténsia no funsionamentu suku iha territóriu nasionál.
Lei suku ne’e previstu artigu hamutuk 97 no modu eleisaun xefe suku eleitu ho sufrájiu universál, livre, diretu, sekretu no pesoál.
Notísia relevante: STAE prevee millaun $9 ba eleisaun xefe suku
Jornalista: Sergio da Cruz
Editór: Evaristo Soares Martins
