DILI, 10 Setembru (TATOLI) – Izraél tenta atu oho líder polítiku sira Hamas nian ho atake aéreu ida hasoru Katár iha loron-tersa ne’e aumenta nia asaun militár iha Médiu Oriente.
Prezidente Estadu Unidu Amérika, Donald Trump, la kontente ho aspetu hotu-hotu hosi atake izraelita nian no sei fó deklarasaun kompletu kona-ba asuntu ne’e iha loron-kuarta.
“Ha’u ladún kontente ho ida-ne’e. La’ós situasaun di’ak ida maibé ha’u sei hatete ida-ne’e, ami hakarak refén sira fila-fali, maibé ami la kontente ho maneira ne’ebé maka akontese ohin,” fó-sai husi Reuters ne’ebé TATOLI asesa, ohin.
Enkuantu Izraél defende atake sira hanesan justifikadu, Katár hatete katak Izraél maka traidór no envolve iha “terrorizmu estadu nian”.
Primeiru-ministru Katár nian, Sheikh Mohammed bin Abdulrahman al-Thani, hatete katak atake aéreu sira ameasa atu estraga konversasaun sira dame nian ne’ebé Katár halo hela mediasaun entre Hamas ho Izraél.
Trump hatete katak nia konsidera atu atua Hamas hanesan objetivu ida ne’ebé merese, maibé nia sente ladi’ak katak atake ne’e akontese iha Estadu Árabe Golfu nian, ne’ebé hanesan aliadu boot ida la’ós NATO nian hosi Washington no iha ne’ebé grupu islamista palestinianu iha ona nia baze polítika.
Atake ne’e hetan kondenasaun hosi Arábia Saudita, Ejiptu, Emiradu Árabe Unidu no Uniaun Europeia, no risku atu estraga konversasaun sira sesarfogu nian iha Gaza no impulsu hosi Trump hodi hetan finál negosiadu ida ba konflitu ne’ebé besik tinan rua ona.
Katár maka parseiru seguransa ida hosi Estadu Unidu no uma-na’in ba Baze Aérea al-Udeid, instalasaun militár boot liu hosi Estadu Unidu iha Médiu Oriente. Ida-ne’e sai hanesan mediadór ida hamutuk ho Ejiptu iha konversa sira entre Izraél no Hamas ba sesarfogu ida iha Gaza, ne’ebé parese sai difisil atu hetan.
Hamas hatete katak nia membru na’in-lima mate ona iha atake ne’e, inklui xefe Hamas nian ne’ebé ezíliu iha Gaza no negosiadór prinsipál Khalil al-Hayya nia oan-mane.
Nia hatete katak Izraél falla iha saida maka Hamas hanaran tentativa ida hodi oho ekipa negosiasaun sesarfogu nian hosi grupu.
Administrasaun Trump simu avizu kona-ba atake hosi militár norte-amerikanu antes de’it ida-ne’e akontese, hatete hosi Trump iha deklarasaun ida iha mídia sosiál antes. Nia la hatete se ida-ne’e maka Izraél ne’ebé fó hatene ba militár norte-amerikanu.
Izraél rekoñese atake iha Doha
Izraél admiti iha tersa-feira (09 setembru) katak planeia no halo operasaun ida hodi halakon líder hosi grupu rezisténsia palestinianu Hamas iha Katár no reklama responsabilidade tomak ba asaun ne’e.
Líder Izraélita Benjamin Netanyahu nia gabinete hatete katak atake ne’e hanesan operasaun Izraélita ida ne’ebé kompletamente independente.
“Izraél maka inísia ida-ne’e, Izraél maka hala’o ida-ne’e, no Izraél iha responsabilidade tomak,” sira hakerek iha plataforma X ne’ebé sita husi Antaranews.
Esplozaun iha Doha, Katár, deskonfia hanesan “tentativa asasinatu” ida hosi responsável ida hosi Hamas, haktuir hosi relatóriu hosi Axios, ne’ebé sita hosi responsável Izraélita ida ne’ebé la fó-sai nia naran.
TATOLI
