DILI, 26 Maiu 2025 (TATOLI)—Ministériu Saúde (MS) liuhosi Servisu Nasionál Ambulánsia Emerjénsia no Medikamentu (SNAEM), prepara ona ambulánsia emerjénsia hamutuk sanulu-resin ba jogu Comunidade dos Paízes da Língua Portuguesa (CPLP) ne’ebé mak sei akontese iha fulan-Jullu, tinan ne’e.
“Bainhira la sufisiente mak ami sei husu apoiu iha parseiru no klínika privada sira,” Diretór Jerál SNAEM, Simplício Amaral, hateten iha nia kna’ar fatin, Kaikoli, segunda ne’e.
Nia hateten, kona-ba pesoál saúde sira-ne’e, MS prepara hamutuk ema na’in-150 hodi halo atendimentu durante jogu CPLP la’o.
“Kona-ba jogu CPLP dezde inísiu até agora, ekipa saúde nasionál hosi Ministériu Saúde servisu hamutuk ho Komisaun Nasionál ba jogu CPLP liuliu Ministériu Juventude, Desportu, Arte no Kultura (MJDAK), la’o hela ne’e. Ita-nia ekipa hosi Hospital Nacional Guido Valadares (HNGV) liuliu ba medisina desportiva nian hala’o ona sira-nia servisu iha psikolojia, nutrisaun no visioterapia, la’o daudaun ona, tanba ita-nia ekipa delegasaun jogu CPLP timoroan agora konsentra ona iha The Hotel Ramelau,” nia relata.
Notísia relevante: MJDAK-Federasaun desportiva ualu diskute prepararivu ba jogu CPLP
Nia esplika, iha semana kotuk ne’e, ekipa SNAEM ba halo observasaun direta iha fatin jogu CPLP, Estádiu Munisipál Dili, atu oinsá mak instala Medical Camping iha-ne’ebá.
“Iha semana kotuk ita vizita fatin ne’ebé mak atu realiza jogu hamutuk hitu (7), ne’ebé mak ita identifika ona no depois ita sei instala ita-nia Medical Camping ka Posku Médiku, nune’e médiku, infermeiru/a n Krúz Vermella Timor-Leste (CVTL-sigla ingleza) sira bele uza no ita bele asegura ita-nia atleta jogu CPLP,” Simplício subliña.
Jornalista: Felicidade Ximenes
Editór: Xisto Freitas da Piedade
