OÉ-CUSSE, 08 janeiru 2024 (TATOLI) – Diresaun Rejionál Konservatóriu Servisu Rejiztu Sivíl Notariádu (DRCRN, sigla portugés) Rejiaun Administrativa Espesiál Oé-Cusse Ambeno (RAEOA) rekolla reseita rihun $16,300 ba kofre Estadu liuhosi atendimentu pasaporte eletróniku.
Notísia relevante: Governu hahú reativa tratamentu pasaporte iha Oé-Cusse
Direitór DRCRN Oé-Cusse, Rui Pereira Monis Sequeira, hateten, Governu reativa Oé-Cusse, hahú iha loron 11 dezembru 2023 to’o janeiru ne’e konsege rekolla reseita rihun $16,300.
“Ami simu aplikante hamutuk ema na’in-316 ho nia orsamentu $16,300.00, osan sira-ne’e, sira selu direita iha banku, depois lori nia resibu mai notariádu maka ami foin haruka sira-nia dokumentu ba nasionál,” Rui Pereira, ko’alia iha Oé-Cusse, segunda ne’e.
Nia informa, mekanizmu atu foti pasaporte bele ba direita iha nasionál maibé tenke hatudu resibu hosi banku no mós billete identidade, notariádu mós prepara funsionáriu ida ba foti iha nasionál, no hein simu de’it iha notariadu Oé-Cusse.
Notísia relevante:Fasilidade atendimentu iha Rejistu Sívil Notariadu RAEOA presiza manutensaun
Tuir nia, durante prosesu atendimentu, la autoriza aplikante trata ho tipu urjente ho presu $100.00 hodi foti iha loron ida nia laran, maibé autoriza de’it atendimentu normál.
“Iha ne’e ami la simu urjente nian, ami simu de’it normál ho presu dollár $50.00 to’o $75,00 ho durasaun semana ida,” nia katak.
Tuir nia, prosesu atendimentu kona-bá pasaporte taka provizória, tanba estoke pasaporte hotu.
“Ami taka aviza iha edifísiu oin, atu aplikante sira haree, katak atendimentu ba pasaporte para, tanba estoke iha nasionál mós laiha, ne’ebé bainhira orientasaun hosi nasionál dehan bele atende fila-fali, maka ami foin aviza,” nia apela.
Notísia relevante:Autoridade RAEOA nomeia Rui Pereira lidera notariádu Oé-Cusse
Jornalista: Abílio Elo Nini
Editor: Evaristo Soares Martins
