OEKUSI, 23 Abríl 2025 (TATOLI) – Prezidente Autoridade RAEOA, Rogério Tiago Lobato, simu ona orientasaun husi Ministériu Administrasaun Estatál (MAE), atu hasa’e bandeira ho meia-haste, nu’udar lutu nasionál hodi fó omenajen ba falesimentu Papa Francisco.
“Ha’u simu ona orientasaun husi MAE ne’ebé dezde horsehik dadersan, ha’u fó kedas instrusaun ba Sekretáriu rejionál sira hotu atu hasa’e bandeira iha edifisíu oin ho meia-haste, atu ita lutu semana ida tanba Papa Francisco nia mate no husik ona ita iha mundu ne’e,” nia dehan ba jornalista sira iha suku Bene-Ufe sub-rejiaun Nítibe, ohin.
Notísia relevante:PN hasa’e bandeira meia-haste fó omenajen ba falesimentu Papa Francisco
Nia informa, instrusaun ne’e la’ós ba Sekretáriu Rejionál sira de’it, maibé orienta mós ba Xefe suku 20 iha Oekusi inklui sidadaun hotu atu kumpre no hamenus festa.
“Ha’u mós orienta liuliu Sekretáriu Rejionál Administrasaun atu informa ba suku 20, katak iha sede suku sira tenke hasa’e bandeira hotu, maibé ho meia-haste, no informa ba komunidade sira atu labele halo festa hodi loke muzika tun-sa’e tanba ita nia nasaun Timor-Leste lutu hela, idak-idak hala’o reza no sunu lilin ba ita-nia Papa, ne’ebé husik ona mundu ne’e,” nia informa.
Papa Francisco hakotu nia jornada moris, iha loron segunda-feira, 21 Abríl 2025.
Notísia relevante:Xefe Estadu partisipa serimónia fúnebre Papa Francisco iha Roma
Papa nia lian ikus antes hakotu iis: “Obrigadu tanba lori ha’u fila-fali ba prasa”
Jornalista: Abílio Elo Nini
Editór: Florencio Miranda Ximenes
