JAKARTA, 15 novembru 2023 (TATOLI) – Ministru Defeza (MD) hosi nasaun membru Organizasaun Sudezte Aziátiku (ASEAN, sigla inglés) kompostu hosi Indonézia, Malázia, Filipina, Brunei Darusalam, Laos, Thailandia, Vietnam, Kamboja, Myanmar, aseita Timor-Leste nia partisipasaun iha enkontru altu nívél entre Ministru Defeza ASEAN ba dala-17 ne’ebé hala’o iha Jakarta tinan ne’e nu’udar estatutu observadór.
Aseitasaun Ministru Defeza ba membru nasaun ASEAN mak deside no aprova iha enkontru nivél entre Ministru Defeza ASEAN nian ne’ebé halo iha Sentru Konvensaun Jakarta, kuarta ne’e.
Enkontru altu nivél entre Ministru Defeza ASEAN ne’ebé hala’o iha Jakarta tinan ne’e prezide direta hosi Ministru Defeza Prabowo.
Iha enkontru ida-ne’e, Ministru Defeza Indonézia, Prabowo Subianto, lori Estadu Indonézia nia naran hato’o bemvidu ba Ministru Defeza nasaun membru ASEAN nian ne’ebé partisipa iha enkontru altu nivél Ministru Defeza ASEAN tinan ne’e iha Indonézia.
Iha sesaun dahuluk hosi reuniaun, diskute no halo aprovasaun hodi aseita Timor-Leste nia Ministru Defeza, Donanciano Costa Gomes ‘Pedro Klamar Fuik’ bele partisipa iha enkontru altu nível entre Ministru Defeza ASEAN ba dala-17.
“Sé nasaun membru ASEAN, imi laiha ona buat ruma ho Timor-Leste nian partisipasaun iha enkontru Ministru Defeza ASEAN (ASEAN Defence Minister Meting) tinan ne’e, ho estatutu nu’udar observadór, ho nune’e ha’u aprova hodi bolu Ministru Defeza Timor-Leste Donaciano Costa Gomes hodi mai hola parte iha enkontru Ministru Defeza ASEAN tinan ne’e ho estatutu hanesan observadór”, Prabowo Subianto dehan iha ámbitu enkontru altu nível ne’e.
Hafoin halo tiha aprovasaun ba TL nian partisipasaun iha enkontru Ministru Defeza ASEAN ba dala-17, Prabowo autoriza Ministru Defeza Timor-Leste Pedro Klamar Fuik hato’o nia intervensaun iha enkontru altu nivél.
Iha oportunidade enkontru Ministru Defeza ASEAN ba dala-17, nasaun membru ASEAN sira ko’alia aprova ajenda prinsipál ida ho naran Senior Oficial Meeting (SON) no iha enkontru SON ne’e membru ASEAN sira diskute kona-ba kestaun seguransa no defeza nasaun sira iha ASEAN ohin loron inklui iha nivél rejionál.
Jornalista: Natalino Costa
Editór : Zezito Silva
