OEKUSI, 21 Agostu 2025 (TATOLI) – Vise-Ministra Solidariedade Sosiál no Inkluzaun (MSSI), Céu Brites, kuarta ne’e halo asaun karidade hodi apoia nesesidade bázika hanesan ai-han no la’ós ai-han ba pasiente psikososiál no família vulneravel iha suku Costa Sub-Rejiaun Pante Makasar Rejiaun Administrativa Espesiál Oekusi Ambeno (RAEOA).
“Ami hala’o vizita domisiliáriu hodi fahe mós ai-han balun ba sira no la’ós ai-han hanesan biti no kulsaun, no observa mós família ida komposta ema na’in-11 moris iha uma ida ho kuartu rua de’it, entaun haree husi kondisaun ne’e, ami fó apoia ai-han no la’ós ai-han ba sira, no mós vizita MSSI nia benefisiáriu iha família ida, labarik na’in-haat problema ho matan, sira haree ladun normál, tanba iha Janeiru 2025 ne’e, MSSI lori sira ba konsulta iha ospitál nasionál entaun na’in-rua hetan ona apoia oklu no haree mós uitoan ona, no na’in-rua seluk seidauk bele tanba sei ki’ik,” nia dehan iha Oekusi, ohin.
Notísia relevante:MSSI introdús padraun operasionál no prosedimentu saúde mentál iha Oé-Cusse
Autoridade governativa ne’e informa, hafoin observa direita kondisaun moris ba ema ho problema psikososiál sira, mak polítika MSSI sei kria kooperasaun ho Ministériu Saúde, nune’e bele tau matan iha futuru.
“Ami-nia polítika mak tenke hadi’a moris ema vulneravel sira ho ema moras (psikososiál), tanba laiha kbiit forsa, entaun Governu sempre fó ajuda maske uitoan maibé bele tulun netik nune’e, utiliza ba nesesidade família nian, entaun atu hadi’a nia moris mak, ita sei serbisu hamutuk ho parte saúde, no autoridade RAEOA atu tau matan mós ba sira,” nia dehan
.Iha fatin hanesan, Xefe Departamentu Sentru Solidariedade Sosiál no Inkluzaun, vizita ne’e plansu husi sentru solidariedade sosiál nian, atu haree kondisaun moris ema ho problema psikososiál no vulneravel sira, iha aldeia Sanane no aldeia Oésono.
“Ida-ne’e sai problema ida ba sira-nia moris, entaun nu’udar serbisu sosiál presiza mós fó tulun. Ne’ebé, ita konsege apoia família violénsia bazeia jéneru ema na’in-10, tanba dadus sira-ne’e ami mak rejista, tanba presiza duni tulun, ne’ebé dadús jerál iha Oekusi, seidauk bele relata ho loloos, tanba sei halo reajustamentu ba bolsa da mãe, bolsa da mãe kondisionál hodi rejistu foun,” nia informa.
Notísia relevante:Reflesaun loron mundiál Saúde Mentál: 10 outubru 2023
Entretantu, tuir dadus husi serbisu saúre rejionál rejista, ema ho mental ne’ebé eziste iha Oekusi hamutuk 70 komposta husi pasiente psikososiál 58 no moras epilepsia (bibi-mat*n) 12.
Jornalista: Abílio Elo Nini
Editór: Rafael Ximenes de A. Belo
