OÉ-CUSSE, 23 janeiru 2024 (TATOLI) –Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Falur Rate Laek, apoia materiál didátiku ba estudante eskola haat iha Rejiaun Administrativa Espesiál Oé-Cusse Ambeno (RAEOA).
Notisia relevante: Fundasaun Falur Rate Laek oferese karteira eskolár ba EBF iha Ossu
Xefe Estadu Maiór Jenerál F-FDTL, Falur Rate Laek, hateten, eskola ne’ebé hetan apoia maka hanesan, Eskola Bázika Sentrál (EBC) Oésilo iha sub-rejiaun Oésilo, EBC Mekosikalote, Eskola Bázika Filiál (EBF) 28 de Agostu no EFB Mahata iha sub-rejiaun Pante Makasar.
Nia informa, apoia hirak-ne’ebé oferese ba estudante sira maka hanesan, livru istória luta nian, lapizeira, kadernu, materiál desportu nian no seluk tán.
“Ida-ne’e halo parte ami-nia programa ida hosi komandu ba apoia sosiál tanba iha fundu uitoan, ne’ebé uluk ami apoia eskola sira halo manutensaun ba klínika inklui estrada, maibé ikus ne’e Governu foun define ba ami katak, apoia de’it materiál didátiku ho materiál desportivu ba eskola sira,” Falur Rate Laek, informa bainhira oferese matéria didátika iha eskola EBC Mekonsikalote, tersa ne’e.
Nia informa, apoia hirak-ne’e ho fundu hosi tinan kotuk nian, hodi aloka ba munisipíu sira, iha Oé-Cusse eskola haat maka hetan ba munisipíu seluk hetan eskola rua, maibé eskolla iha área remota sira, ne’ebé defisíl asesu ba estrada no transporte.
Nune’e, apoia hirak-ne’ebé iha, ho de’it ekipamentu didátiku ba eskola sira, hanesan livru, agora ne’e haree livru istória militár diáriu nian liuliu komandante jerál sira hanesan, jenerál Taur Matan Ruak, Jenerál Lere Anan Timur, Jenerál Mau Nana no Falur Rate Laek.
“Ami-nia diáriu sira hakerek ne’e, maka ami mai informa istória luta libertasaun ne’e ba estudante sira, livru sira-ne’e ami hakerek ho tetén no portugés, ne’ebé fasil ba alunu sira atu lé, tanba juventude liuliu estudante sira importante atu hametin ita-nia sentidu patriótika no sentidu nasionalizmu iha eskola atu labele kria instabilidade,” nia katak.
Diretór Eskola EBC Mekosikaloti, Júlio Beno, agradese ba komandu F-FDTL, tanba hili EBC Naimeko hodi hetan apoia matéria didátiku, no promete sei utiliza sasán hirak-ne’e ho domin.
“Apoia ne’ebé maka apoia ona, ami sei utiliza ho fuan no laran, nune’e bele eduka no orienta ami-nia alunu sira, la’o tuir talentu ne’ebé maka iha, nune’e atubele alkansa sira-nia futuru sai di’ak liuhosi desportivu, arte no kultura ho materiál ne’ebé iha, atubele hakerek no lé siénsia ne’ebé iha, lori hanesan bukae ba sira-nia future.”
Totál estudante primeiru siklu to’o terseiru siklu hamutuk 837 komposta hosi feto 418 no mane 419, ho totál profesór hamutuk 33, permanente 19 no kontratadu 14.
Notisia relevante:Falur husu membru F-FDTL nafatin sai liman kroat povu Timor-Leste
Entretantu, remata oferese apoia sosiál ne’e, Xefe Estadu Maiór Jenerál F-FDTL, Tenente Jenerál Falur Rate Laek, hamutuk ekipa akompaña hosi profesór no estudante sira, halo lembransa hodi kuda ai-oan iha área eskola sira.
Jornalista: Abílio Elo Nino
Editór: Evaristo Soares Martin
