OÉ-CUSSE, 29 abríl 2024 (TATOLI) – Xefe Suku Lela-Ufe, husi sub-rejiaun Nítibe, José Neno Sila no Xefe suku Costa, husi sub-rejiaun Pante Makasar, Francisco Colo, husu Autoridade Rejiaun Administrativa Espesiál O’e-Cusse Ambeno (RAEOA), lideradu Rogério Tiago Lobato, atubele oriénta Diresaun Rejionál Infraestrutura hodi hadi’a estrada rurál sira-ne’ebé hetan estragu iha ámbitu tempu udan.
Notísia relevante:Estrada kotu, difikulta komunidade Kutete lori produtu lokál ba merkadu
“Ami-nia sub-rejiaun Nítibe, kuaze estrada sira hetan estragu, tanba akontese udan boot to’o agora atu tama ona ba tempu bailoron, maibé estrada seidauk di’ak, komunidade sira labele asesu bá iha merkadu no estudante mós susar atu asesu ba eskola ho di’ak,” José Sila, ko’alia iha Oé-Cusse, segudan ne’e.
“Ami sujere bá Autoridade liuliu Obra Públika atubele hadi’a netik ami-nia dalan husi Ulas suku Taiboko bá to’o iha postu Nítibe tuan, nune’e bele fasilita transporte sira bele asesu bá to’o iha suku Usitaku no Lela-Ufe, tanba estrada ku’ak, balu estragu totál, nune’e difikulta transporte públiku no privada atu asesu ho kondisaun di’ak, entaun bainhira komunidade sira atu tún mai Oé-Cusse vila, la’o-ain de’it mai to’o Ulas mak foin hein karreta, tanba transporte sira mós asesu to’o ne’e de’it,” nia rekomenda.
Hosi fatin seluk, Xefe suku Costa, husi sub-rejiaun Pante Makasar, Francisco Colo, informa mós kona-bá estrada ida iha baiiru Kutete, aldeia Mahata, mai iha sentru kapitál Oé-Cusse, estragu tanba afeta husi dezastre naturál inundasaun tanba udan-boot iha 04 abríl foin lalais ne’e, to’o agora seidauk hadi’a.
“Ha’u rasik komunika direita ho Diresaun Rejionál Infraestrutura (DRI), atu hadi’a, tanba desde estrada ne’e kotu afeta tebes ba komunidade asesu ba merkadu, maibé to’o agora seidauk hadi’a,” Francisco Colo informa.
Notísia relevante: DRI no ADN fiskaliza uluk projetu 183 molok halo pagamentu
Lideransa komunitáriu ne’e, iha tempu badak Diresaun Rejionál Infraestrutura, bele halo ona manutensaun ba estrada refere liuhosi Institutu Jestaun Ekipamentu (IGE, sigla portugés), tanba kuaze fulan ida ona komunidade sira la’o ain-de’it hodi asesu ba merkadu.
“Estrada ne’e kotu impaktu ba komunidade suku rua, Costa no suku Nípani, ne’e iha bairru Nunu-Ana iha ne’ebá mós destaka hela postu seguránsa UPF, entaun persiza aselera lalais tanba estrada ne’e liha ho sentru rejionál Oé-Cusse vila no komunidade fronteira liu-liu postu UPF Nunu-Ana, entaun persiza halo manutensaun ba etsrada ida-ne’e,” nia husu.
Hatan ba problema ne’e, Diretór Rejionál Infraestrutura, Remígio Nuno Sila, hateten, kona-bá estrada rurál sira, inklui kotu iha Kutete, parte DRI rekolla ona, no promete sei hadi’a iha tempu badak.
“Ha’u-nia ekipa hamutuk ho Departamentu IGE ami ba haree direita ona iha terrenu, rai halai halo estrada kotu, ha’u rekomenda ona serbisu ba sira, atu halo normalizasaun, tanba transporte sira susar atu ultrapasa, ami tun iha semana ne’e ka semana oin tanba sei hein aprovasaun kustu operasaun no persiza kombustível, nune’e sira bele sai ona bá terrenu liuliu ba estrada sira-ne’ebé kotu no aat totál,” nia katak.
Notísia relevante: Remígio Nuno Sila, nomeadu nu’udar Diretór Obra Públika Oé-Cusse
Jornalista: Abílio Elo Nini
Editór: Evaristo Soares Martins
