DILI, (ANTIL)- Kampaña eleitorál kandidatu Prezidente Repúblika (PR) ba períodu 2017-2022, José António das Neves “Samala Rua” dahuluk sei hahú aban, 3 Marsu 2017 iha Munisípiu Manufahi ho razaun tanba Manufahi nu’udar fatin istóriku.
Kandidatu ho númeru 4 informa ba ANTIL iha Palapasu, kampaña eleitorál hili fatin refere tanba iha tempu kolonializmu Don Boaventura luta hodi kombate okupasun sira husi rai seluk.
“Símbolu Don Boaventura iha ne’ebá, maibé reasaun ema hotu iha Timor-Leste ne’e hodi hasoru kolonializmu Portugueza.
“Iha Same, ami sei ba halo kampaña iha Kasa atu konsentra munisípiu tolu mak hanesan Suai, Ainaru no Same rasik, tanba kapasidade la to’o atubele la’o to’o munisípiu hotu-hotu,” José dehan.
José esplika, atividade kampañia ne’ebé sei hala’o ne’e, iha ekipa husi kandidatu ne’ebé mak halo preparasaun iha baze no la presiza ema barak nia partisipasaun tanba lahalo mobilizasaun boot, maibé komunikasaun direta ne’e mak importante.
“Kampaña ne’e ita halo ema atu hatene saída no koñese saída? Ema atu hatene kandidatura ne’e dalan barak ne’ebé ha’u uza mak, dalan barak legalmente la’o mak ema dehan door to door, diálogu, komisiu (aberta), fahe brosura no estiker. Tanba ema ne’ebé iha osan barak mak bele gasta ba bolu, aluga karreta tula ema mai no prepara hahán ba ema,” José dehan.
José salienta, atributu ne’ebé sei utiliza iha kampaña laiha sentidu, maibé utiliza xapeo atu iha diferente de’it, kamizola simples liu mutin no tau foto kandidatura nia, maibé nia prinsípiu mak baratu. “Kamizola mutin, kór ne’e ami hili kór azúl ho verde mak hanesan natureza ho kalohan. Tanba buat sira ne’e ami adota dalan ida simples no baratu, maibé komunikavel. Iha kampaña ne’e, ami sei hala’o husi Kasa mai iha Ainaru ami sei ko’alia tuir dalan husi Maubise, Aileu no hetan ema fahe brosura to’o Dili”.
Hafoin kontinua bá liu Lospalos ne’ebé iha grupu komisiu ida hafoin mai fali iha Baucau no fila bá Dili hodi kontinua bá fali Oekusi, hakat fali bá Maliana, Ermera no Dili mak bá fali Atauro no remata iha Dili mak ema barak sei partisipa.
Jornalista: Maria Auxiliadora/ Editor: Gantry Meilana
