TIBAR, (TATOLI) – Diretór Sentru Nasionál Empregu no Formasaun Profisionál (SNEFP), Simão Titto Barreto hatete, sentru iha hanoin ba graduadu sira ne’ebé tuir formasaun ne’ebé lahetan serbisu bele fila atu hahú sira-nia negósiu.
“Husi empreza ne’e mak sentru apoiu husi parte tékniku no jestaun nian”, nia hatete. SNEFP iha graduadu antigu sira ne’ebé forma ona iha grupu sia hodi foka ba área nesesidade potensiál atubele halo buat ruma.
“Soldadura mak ba solda ema nia uma no ema fó ona kontratu, pedreiru ba kaer ema nia obra, karpitaria ba loke ona loja, agrikultura halo sira-nia to’os mesak no haruka produtu ba hatama ona iha merkadu”, informa.
Grupu sira ne’e forma entre ema na’in-tolu to’o lima maibé envolve mós komunidade hodi hola parte mós.
Simão afirma produtu agrikultura iha Dili laran sei menus loos hanesan iha merkadu Taibesi, Manleu no supermerkadu sira.
“Alin oan sira iha Aileu no Maliana lori sira-nia melaun no fore-tali lori diretamente ba supermerkadu sira ne’e no distributór supermerkadu sira mak hola direta. Kuandu supermerkadu sira lakonsege hola, sira tula iha kamioneta hatún iha merkadu lokál sira kuaze ema hola hotu”.
Jornalista: Maria Auxiliadora
Editora: Rita Almeida
