DILI, (TATOLI) – Partisipasaun veteranu timoroan ba loron ANZAC foin lalais ne’e iha Austrália hanesan parte ida hametin amizade hodi apoia fronteira marítima.
“Iha relatóriu ne’e, veteranu Austrália fó apresiasaun ba veteranu Timor-Leste hodi kria lasu amizade entre Nasaun rua atu fó apoiu maka’as ba problema fronteira marítima”, hateten Sekretáriu Taskforce Veteranu Kombatente Libertasaun Nasionál ba Asuntu Interese Nasionál, Jorge Alves iha Palásiu Governu bainhira aprejenta relatóriu prezensa veteranu iha loron ANZAC.
Selebrasaun loron ANZAC iha Austrália, 25 abril ba dala 102 hanesan referénsia ba veteranu timoroan oinsá atu harii organizasaun veteranu nomos oinsá hola parte iha prosesu dezenvolvimentu nasionál.
Veteranu Austrália apoiu veteranu timoroan kona-ba fronteira marítima, laiha dúvida, sira nia apoiu halo manifestasaun, hasai rasik osan hodi mobiliza malu no seluk tan.
Liuhosi amizade ne’e atu hametin veteranu hosi rai rua hodi servi ba povu no Nasaun, veteranu sai hanesan organizasaun ne’ebé independente maibé hateten buat ne’ebé loos ba povu no Nasaun entre Nasaun rua.
Veteranu sira nia luta durante tinan 24 iha ailaran, sira nia luta hanesan eroi foun atu liberta pátria no liberta povu liuhosi dezenvolvimentun no atu kompleta soberania.
Jornalista: Zezito Silva
Editora: Rita Almeida
