DILI, (TATOLI)—Sekretária Ezekutiva CPLP, Maria do Carmo Silveira informa katak ohin, kinta (18/5) hasoru malu ho Primeiru-Ministru, Rui Maria de Araújo iha Palásiu Governu ho objetivu dahuluk atu komprimenta xefe governu no autoridade timoroan sira.
“Ne’e ha’u-nia vizita dahuluk ba Timor-Leste, naturalmente atu partisipa pose prezidente eleitu timoroan nian no kumprimente autoridade Timor-Leste nomós hato’o agradesimentu ba nomeisaun nu’udar sekretáriu ezekutivu iha Simeira Brazilia”, Sekretária Maria do Carmo informa.
Iha sorumutu ne’e mós ko’alia kona-ba dezafiu sira ne’ebé CPLP hasoru. “Partikularmente ho aprovasaun ba vizaun estratéjika tinan sanulu nian liliu prioridade sira iha ha’u-nia mandatu,” sekretáriu exekutivu husi nasaun belun São tomense ne’e. “Partilla ideia sira ho primeiru-ministru”, susesór sekretáriu Murade Muragy ne’e hatutan tan.
Sekretáriu Ezekutiva CPLP, Maria do Carmo informa katak iha sorumutu ne’e rona mós orientasaun balun husi xefe governu timoroan ne’e. “Nune’e mós proposta balun”, tenik sekretária ne’e.
Entretantu, antes ne’e iha mós informasaun katak sekretária ne’e sei hela iha Timor-Leste to’o 23 maiu atu partisipa iha ámbitu konferénsia globál ne’ebé sei hala’o iha CCD (Centro das Convenções de Díli).
Notísia relevante: http://e-global.pt/noticias/lusofonia/timor-leste/secretaria-executiva-da-cplp-assiste-a-empossamento-de-francisco-guterres-lu-olo/
Jornalista: Rafy Belo
Editora: Rita Almeida
