DILI, (TATOLI) – Servisu Rejistrasaun no Verifikasaun Emprezariál (SERVE) fó tempu ba kompañia internasionál husi Indonézia, Citilink ne’ebé hala’o ona operasaun iha Timor-Leste iha fulan ne’e, hafoin semo loron tolu atu rejistu iha SERVE.
“Nia hakarak ka lakohi banati tuir regulamentu ne’ebé iha. Citilink kompañia boot iha Indonézia nian labele mai semo sein dokumentu ruma, ne’ebé ha’u fó prazu loron 5 maibé minstru dehan fó loron 10 para nia bele kumpri ou la’e, lakumpri, deskulpa ita labele halo buat ne’e ba oin”, Diretór SERVE, Florêncio Sanches ba jornalista sita iha salaun Ministériu Solidariedade Sosiál, ohin.
Tuir loloos kompañia tenke halo tuir lei mak foin opera maibé realidade hala’o ona operasaun, nune’e husi parte SERVE bolu kompañia ne’e no halo enkontru ho ministériu relevante.
“Sertifikadu tenke hatudu no aprezenta tiha mak foin halo negósiu no halo negósiu sein sertifikadu, maibé sira hakarak kumpri”.
Nune’e SERVE fó tempu loron sanulu, hahú husi ohin , loron 18 ba empreza Citilink atu trata dokumentu hodi kumpri regulamentu ne’ebé estabelese iha nasaun ida ne’e.
“Loloos zerro toleránsia maibé nia halo tiha ona, sein koñesimentu, prontu ita regula. Depois loron sanulu mak nia latuir ita tenke haruka para. Hatudu katak ita mak implementa lei ne’e”.
Kompañia ne’e hala’o ona nia operasaun maibé la-kumpri lei Sosiedade Komersiál númeru 4/2004, Dekretu Lei númeru 7/2017 kona-ba kódigu rejistu komersiál, Lei númeru 8/2008 kona-ba tributária, Dekretu Lei 35/2012 liuliu artigu 26 ne’ebé ko’alia kona-ba kompañia nia língua no artigu 27 kona-ba lian país kompañia nian no Dekretu Lei 24/2011 kona-ba lisensiamentu komersiál.
“Tanba ne’e mak SERVE deklara ba sira, imi seidauk entidade legál iha Timór maibé nia halo ona negósiu, tanba ne’e mak sira horisehik mai no rona informasaun ne’e no hakarak banati tuir”.
Atu klarifika atividade empreza ne’e, husi parte SERVE hala’o ona sorumutuk ho autoridade aviasaun sivíl no ministru katak atividade ne’e loloos labele akontese tanba Estadu halo ona publikasaun kona-ba empreza balun ne’ebé hakarak halo negósiu tenke tuir lei no iha loron lima de’it bele hetan sertifikadu no gratuita.
“Tanba ne’e nia xefe boot husi Jakarta to’o mai husu deskulpa”.
Maski atividade ne’e hala’o tiha ona, nune’e tuir artigu balun ne’ebé temi iha lei katak kompañia refere bele falla lisensa iha futuru mezmu hetan ona lisensiamentu husi Governu maibé implementasaun iha terrenu mak laloos no iha artigu seluk temi mós sei hetan sansaun. Enkuantu atu taka labele tanba lei sosiedade komersiál lafó dalan.
Tuir informasaun katak autorizasaun ba Citilink ne’e husi Autoridade Aviasaun Sivíl enkuantu seidauk tuir prosedimentu legál iha Timor-Leste.
Jornalista: Maria Auxiliadora
Editora: Rita Almeida
