DILI, (TATOLI) – Komisária komisaun nasionál ba direitu labarik, Maria Barreto hateten área importante haat hanesan asesu ba edukasaun, saúde, partisipasaun no protesaun tuir planu asaun nasionál ba labarik.
ʺPontu importante haat ne’e maka iha planu asaun nasionál ba labarikʺ, dehan komisária ne’e durante komemora loron internasionál ba labarik iha Palásiu Prezidensiál Bairo-Pite Dili, kinta (1/6).
Iha planu asaun ne’e, komisaun husu atu ministériu ida-idak tenke implementa planu asaun ne’e iha programa ministériu ida-idak.
ʺSEPFOPE iha obrigasaun atu kria lei ida hodi proteje labarik sira husi servisu infantil, no esplorasaun hasoru labarik hodi hetan osan, enkuantu MSS (Ministériu Solidaridade no Sosiál) kria ona esbosu lei konaba protesaun ba diretu labarikʺ, esplika.
Tuir nia, enkuantu husi Ministériu Saúde tenke haree liliu ba saúde família hodi hasa’e nutrisaun ba labarik sira.
ʺMinistériu Edukasaun presiza kria eskola pre-eskolár no edukasaun bázika, tanba ne’e governu presiza dezenvolve iha suku atu labarik sira husi tinan tolu to’o lima bele partisipa iha estudu pre-eskolár hodi aprende lé no hakerekʺ, realsa.
Alende ne’e, partisipasaun labarik sira iha informasaun mós importante oinsá atu hetan informasaun ho kualidade no edukativu ba prosesu dezenvolvimentu.
Ministériu Saúde, Ministériu Edukasaun, Ministériu Solidaridade Sosiál, Ministériu Justisa, SEPFOPE maka sai ministériu save hodi implementa planu asaun ba protesaun labarik.
Entretantu, Prezidente Republika, Francisco Guterres Lú-Olo iha komemorasaun ne’e halo ona lansamentu ba planu asaun nasionál ba labarik hodi entrega kedas ba Primeiru Ministru, Rui Maria de Araújo nu’udar matan dalan ba proteje direitu labarik.
Jornalista: Agapito dos Santos
Editora: Rita Almeida
