DILI (TATOLI)- Enkontru Konsellu Ministru (KM) ohin, Tesa (13/06) aprova memorandu kona-bá rejime komérsiu esternu vijente iha Timor-Leste hanesan desizaun ida atu Ministru Estadu Koordenadór Asuntu Ekonómiku (MEKAE) lori dokumentu ne’e bá organizasaun Mundiál Komérsiu (OMK) para hahú halo negosiasaun ho OMK.
MEKAE, Estanislau Aleixo da Silva hatete Timor-Leste iha tinan kotuk liuhusi MEKAE bá Jenebra hodi halo diskursu iha OMK no simu Timor-Leste hanesan observadór. Bainhira Timor-Leste sai hanesan observadór, OMK harii grupu traballu (working party) hanesan komité traballu atu halo negosiasaun.
“Ne’e duni, bainhira ita halo negosiasaun ita presiza lori memorandu free trade agreement kona-ba rejime komérsiu no ne’e la’ós buat ida foun, ne’e haree ba realidade ita-nia rai nian hanesan Estadu de nasaun iha termu ekonómiku, haree ba kuadru legál, polítika ne’ebé ita iha no ita tau hamutuk iha dokumentu ida. Agora ita lori dokumentu ne’e atu hahú servisu working party nian,” Estanislau esplika.
Iha grupu traballu ne’e, Timor-Leste husu Portugál mak sei prezide tanba sira iha esperiénsia barak ona no fó apoiú ba Timor-Leste bainhira halo negosiasaun ho OMK.
Tanba ne’e ba Timor atu hahú negosiasaun presiza forma ekipa ida, meus ida atu estabelese ekipa ohin loron MEKAE haruka ona maluk timoroan balun tuir treinu hafoin hahú negosiasaun.
(Jornalista : Maria Auxiliadora, Editór : Manuel Pinto)
