DILI, (TATOLI) – Komisária Komisaun Funsaun Públika, Maria Domingas Alves hatete atu halo revolusaun iha funsaun públika mak formasaun adekuada.
“Iha kampu serbisu ne’ebé ita hetan, maioria funsionáriu públiku hetan formasaun administrasaun públika kahur malu, finansa dalabarak presiza rekursu umana adekuada nomós turizmu”, hatete Komisária iha nia intervensaun perante emposadu na’in 88 husi Ministériu Edukasaun iha salaun Infordepe, Balide, ohin.
Nia hatutan, hakarak hetan ema ho espesialidade iha turizmu inklui mós área seluk hanesan enjeñária, asisténsia sosiál, edukasaun no seluk tan. “Ita iha problema ida ne’e, atu rezolve, ita sei hamutuk, funsaun públika halo estratejia didi’ak ho presizaun, halo diagnóstiku”.
Tuir nia, halo diagnóstiku la’ós sai fama ida. Atu hadi’a, presiza ema hotu nia kooperasaun, presiza ita hotu hakarak atu partisipa iha formasaun, mezmu iha koñesimentu barak, presiza hakru’uk iha formasaun ruma.
Entretantu, funsionáriu publiku ne’ebé simu tomada de posse kompromete atu serbisu tuir lei funsaun públika no regra sira ho atensaun másimu, dedikasaun no responsabilidade.
Emposadu ne’ebé simu pose ne’e kompostu mane na’in 47 no feto na’in 41.
Jornalista: Rafy Belo
Editora: Rita Almeida
