DILI (TATOLI)–Xefe estadu Maiór FALINTIL-Forsa Defeza Timor-Leste (F/FDTL), Major Jenerál, Lere Anan Timor, fó hanoin katak, karik oitavu governu hili eis-jenerál, Taur Matan Ruak nu’udar Primeiru Ministru (PM), entrega mós kargu Ministru Defeza no Seguransa (MDS) ba Taur tanba Nia iha esperiénsia militár.
“Tuir informasaun ne’ebé ha’u asesu, Taur Matan Ruak maka sei asume pasta Primeiru Ministru tanba nee di’ak liu tan asume mós pasta Ministru defeza no seguransa,” Jenerál fitun rua ne’e informa iha kuartél Jerál FDTL Fatu hada, Ohin.
Nia dehan, Taur Matan Ruak ema ida iha esperiénsia militár, nune’e mós “Katuas” Xanana Gusmão.
“Husu atu nomea figura ida ne’ebé iha kapasidade no koñesimentu iha area militár hanesan Prezidente Partidu CNRT, Kay Rala Xanana Gusmão ho Eis-Jenerál. Taur Matan Ruak mak lidera ministériu ne’ebé toma konta ba F/FDTL ho PNTL,” Lere husu tanba konsidera kapasidade no koñesimentu figura Taur Matan Ruak ho Xanana Gusmão, maibé Nia dehan fali se la’ós sira na’in rua mós, ministru ne’ebé ka’er kargu ministru Defeza no Seguransa tenke esperiénsia hanesan Taur Matan Ruak ho Xanana Gusmão.
Ezijénsia seluk hosi Xefe estadu Maiór FALINTIL-Forsa Defeza Timor-Leste (F/FDTL), Major Jenerál, Lere husu atu oitavu governu kontinua akumula instituisaun Polisia Nasionál Timor Leste (PNTL) no F/FDTL iha ministériu ida.
“Para instituisaun rua nee hanesan maun alin nafatin hodi ami repete beibeik,”
Jornalista : Agapito dos Santos
Editór : Manuel Pinto
