DILI, (TATOLI) – Sekretáriu Estadu Komunikasaun Sosiál (SEKOMS) husu ba embaixada Portugal no Institutu Camões, I.P, iha Timor-Leste atu forma timoroan sira iha lian-portugés hodi fasilita fali ba nível munisípiu to’o iha área rurál sira, tan relasaun Timor-Leste ho Portugal ne’e istóriku no estratéjiku.
“Hanesan sekretáriu estadu komunikasaun sosiál dehan ita presiza dezenvolve di’ak liutan iha nível nasionál no oinsá to’o munisípiu, área rurál”, katak governante ne’e ba jornalista sira iha Palásiu Governu, ohin, hafoin sorumutu ho embaixadór Portugal iha TL, José Pedro Machado Viera no vise-prezidente Institutu Camões, Gonçalo Teles Gomes.
Merício Akara haktuir durante enkontru, alende ko’alia relasaun entre Timor-Leste no Portugal, operasionál sira ko’alia kona-ba oinsá apoia jornalista sira iha lian-portugés.
“Durante ne’e fó kursu portugés ba jornalista sira, ninia resultadu kapás no ita-nia jornalista sira hatene portugés no barak agora hakerek notísia ho lian portugés”, rekoñese.
Tanba ne’e, tuir husu ba embaixada Portugal no Institutu Camões, I.P. fó formasaun hodi prepara timoroan sira.
“Depois timoroan maka kontinua fó formasaun ba ita-nia jornalista sira, joven sira iha munisípiu no iha área rurál”.
Akara mós haktuir durante sorumutu ko’alia oinsá apoiu tékniku ba Radiu no Televizaun Timor-Leste (RTTL).
“Ha’u dehan ba sira katak ita iha faze atu moderniza ita-nia sistema RTTL, ita mós haree infraestrutura i ita mós hahú hanoin ba konteúdu, programa, notísia. Entaun, sira mós fó hanoin RTP iha esperiénsia i ita hahú bele ko’alia, identifika konteúdu no programa saida mak presiza apoia maka’as”.
Relasaun ho TATOLI-Ajénsia Notisioza Timor-Leste, sekretáriu estadu akresenta atu halo kooperasaun ne’ebé di’ak, nune’e nia informa ba embaixada Portugal atu informa mós ba Ajénsia Lusa; karik iha tempu besik mai hahú ko’alia ba malu, la’ós formasaun iha rai laran de’it maibé bele mós interkánbiu entre jornalista TATOLI ba Ajénsia Lusa iha Portugal, bele mós sira-nia espesialista mai fó treinamentu ba Ajénsia TATOLI iha konteúdu portugés nian atu lansa ba rai li’ur.
“Parte rua iha vontade kontinua halo kooperasaun. Nível operasional, tékniku sei diskute. Agora ne’e hanesan ita iha persepsaun iha nível prinsípiu, polítika, hatudu ita-nia kompromisu kontinua koopera”, tenik tan.
Iha fatin hanesan, vise-prezidente Camões, Gonçalo Teles Gomes, ba jornalista sira haktuir SEKOMS nafatin husu apoiu Portugal, liuliu Institutu Camões, espesífiku ba iha komunikasaun sosiál.
“Oras ne’e dadaun eziste projetu ida importante; konsultóriu língua, ne’ebé forma profisionál komunikasaun sosiál sira no asesória imprensa sira iha língua portugeza no produsaun língua portugeza ho nia edisaun no sekretáriu estadu manifesta ninia dezeju la’ós kontinua de’it projetu ida ne’e maibé mós aprofunda hodi kolabora mós iha diseminasaun no konteúdu língua portugeza iha komunikasaun sosiál iha Timor ba teritóriu tomak”, katak.
Kona-ba RTTL no Ajénsia TATOLI nian, vise-prezidente Camões, Gonçalo Teles Gomes, akresenta halo kolaborasaun ho komunikasaun sosiál Portugal; RTP (Radiu no Televizaun Portugeza) no Lusa, Portugal disponível.
“Ha’u manifesta disponibilidade no interese Portugal hodi komesa halo kolaborasaun iha área sira ne’e”, kompromete Gonçalo Teles Gomes.
Relasiona ho dezenvolvimentu linguístiku jornalista benefisiáriu projetu Camões, vise-prezidente Institutu Camões ne’e akresenta ne’e sinál pozitivu.
“Projetu iha dadaun rezultadu konkretu. Ita labele to’o de’it iha ne’e, presiza liutan ho ita-boot sira, ita hotu nia kolaborasaun ita alkansa rezultadu ne’e”.
Entretantu, embaixadór Portugal, José Pedro Machado Viera, destaka kontinuasan ba formasaun língua portugeza ba jornalista sira sei nafatin, tuir prazu previstu, tinan ida tan.
“Maibé konserteza ita hanoin hodi hanaruk no kooperasaun kontinua nu’udar país irmão (maun-alin)”, subliña José Pedro Machado Viera.
Jornalista: Rafy Belo
Editora: Rita Almeida
