DILI, (TATOLI) – Governu liuhosi Ministru Obras Públikas, Salvador Soares dos Reis Pires, agradese ba kompañia sira ne’ebé durante ne’e fornese kombustivel ba sentrál eletrika Hera no Betano mak ETO ho SAKOM, tanba fó ona apoiu hodi fornese ahi ba teritóriu.
“Iha biban ne’e ha’u agradese ba kompañia Esperansa Timor Oan (ETO) no SAKOM enerjia, liuliu kompañia ETO, tanba iha tempu impasse polítika kompañia ne’e konsege ajuda governu hodi sustenta nafatin produsaun enerjia eletrisidade hodi fornese ba ita nia povu”, tenik ba jornalista sira iha Palásiu Governu, kinta ne’e.
Tuir governante ne’e agora kompañia sira kontinua fornese kombustivel ba sentru produsaun enerjia eletrisidade Hera.
“Kompañia SAKOM mós fornese ona kombustivel ba sentrál eletrisidade Hera, no iha tempu badak sei fornese hikas kombustivel ba sentrál eletrisidade Betano ne’ebé durante ne’e paradu”.
Nia mós haktuir governu halo ona pagamentu ba kompañia ETO ho osan duodésimu ho montante milliaun $3.5, tanba ne’e kompañia ne’e kontinua fornese mina ba sentru produsaun enerjia eletrisidade Hera.
Biban ne’e, ministru mós agradese Prezidente Repúblika (PR), Francisco Guterres Lú Olo, ne’ebé promulga ona Orsamentu Lei Jerál Estadu (OJE) 2018.
“Ita agradese Prezidente Repúblika, tanba promulga ona ita nia orsamentu, ne’e signifika katak iha tempu badak ami sei rezolve ami nia dívida ho kompañia sira ne’ebé fornese kombustivel nomós halo manutensaun ba transmisaun eletrisidade, manutensaun ba jeradadór iha sentru produsaun ba enerjia eletrisidade iha Hera no Betano”, katak.
Jornalista: Julia Chatarina
Editora: Rita Almeida
