DILI,(TATOLI)-Prezidente Tribunál Rekursu (PTR), Deolindo dos Santos, iha abertura ba Asembleia Jerál da-sanulu ba OISC/CPLP (Organizasaun ba Instituisaun Superiór Kontrolu/Comunidade dos Países da Língua Portuguesa), iha Hotel Novo Turismo, ohin, katak atu garante boa governasaun, sidadaun no sosiedade sívil nia kontribuisaun importante no kontrolu sosiál ne’e fundamentál.
“Ko’alia kona-ba Câmara de Contas, servisu setór privadu sira no sosiedade sivil fó kontribuisaun másimu, nune’e prosesu ne’e la’o ho di’ak no sai susesu iha futuru,” hateten prezidente Tribunál Rekursu, Deolindo dos Santos ba jornalist sira, iha marjen asembleia ho tópiku O impacto da colaboração das instituições públicas e privadas na melhoria dos trabalhos da instituições supriores de controlo.
OISC/CPLP ne’e nia kompeténsia mak hodi halo kontrolu ba finansa públika, halo fiskalizasaun ba legalidade no regularidade husi reseita no despeza públika nomós halo apresiasaun ba boa jestaun finanseira. Timor-Leste sai membru ba OISC/CPLP iha 2012 no tinan ne’e Timor-Leste sai uma na’in.
Iha abretura ne’e, Timor-Leste, tuir observasaun Ajénsia TATOLI hetan apresiasaun husi PTR país membru CPLP ho direitu pleno sira no entidade relevante sira ba ospitalidade povu no estadu Timor-Leste nian.
Entretantu, Asembleia Jerál OISC, organizasaun komunidade luzófona ne’e, partisipante husi Angola reprezenta Prezidente Tribunál das Contas Angola, Exaligina Gamboa, Brasil reprezenta Ministru Walton Alekar, Portugal reprezenta husi PTR, Vitor Caldeira, Cabo Verde reprezenta PTR, José Caros Delgado, Guiné-Bisau reprezenta husi Prezidente Tribunál das Contas, Dionísio Cabi, São Tomé e Principé reprezenta husi José A. de Monte, Moçambique reprezenta husi Machatine Munguanbe no Macau reprezenta husi Komisáriu Ho Veng.
Inklui, korpu diplomata no embaixadór sira ne’ebé mak nia rezidénsia iha Timor-Leste no konvidadu onradu sira seluk tan.
Notisía relevante; http://www.tatoli.tl/2018/09/timor-leste-sei-sai-uma-nain-ba-asembleia-oisc-cplp/
Jornalista: Rafy Belo
Editór : Manuel Pinto
