Top

Dala-Ida Tan Atanásio Fó Volta Timór Hodi Halai Ba Loron Vitória

Foto Facebook/Boy Sabak.

DILI, (TATOLI) – Husi kilómetru 0 hahú tuku haat madrugada iha Prasa Proklamasaun, Palásiu Governu nia oin, Atanásio Viana, sei halo nia aventura dala-ida tan hale’u Timór ho motór iha oras 24 nia laran hodi  halai ba loron vitória nian (ride for victory day) no selebra loron  mundiál turizmu liuhusi turizmu aventura.

Ho eventu ida ho naran “ Fó Volta Timor-Leste: Loron Ida, Hakat Ida, Ain Fatin Barak, Halai Ba Loron Vitória nian, Boy Sabak naran estimadu husi aventureiru ida ne’e hakarak hale’u maizumenus iha oras  20 nia laran de’it antes to’o ba oras 24.

“Husi títulu ne’e hakarak hatudu ha’u-nia espresaun, ha’u-nia hobby, ha’u-nia serbisu katak fulan-setembru ne’e fulan ida ne’ebé fó vitória ba Timór. Ita haree filafali ba kotuk iha 1999, iha ne’ebá ita rona rezultadu votasaun iha 4 setembru depois iha 20 setembru INTERFET tama mai iha ne’e no loron ida ne’e vitória ida mai ha’u mesak, tanba foin ba dahuluk timoroan ida hakarak record (grava) hale’u Timór,” Vikeke oan ne’e konta iha Palásiu Governu, ohin.

Liuhusi solo touring (tour mesak) ne’ebé sei hahú aban (29/11/2018), Boy Sabak, halo preparasaun másima atubele atinje alvu husi eventu ne’e.

“Husi kondisaun motór, roupa ne’ebé ha’u uza, fíziku ha’u toman, tanba la’o beibeik no ekipamentu kompletu, ha’u uza GPS (Global Positioning System) depois fila mai Dili ha’u hatudu kedas katak record ne’e iha duni nomós halo filmajen tuir dalan no ha’u hanoin bele atinje”, nia promete.

Liuhusi atividade Timor Story Adventure (aventura hosi istória Timor), Vikeke oan ne’ebé gosta sa’e motór ne’e dehan hale’u país ne’e liuhusi dalan boot de’it nia distánsia ladún dook.

“Ezemplu, distánsia aban ha’u atu la’o ne’e lato’o kilómetru 1000 hanesan ne’e, maibé nia obstákulu ne’e maka dalan”.

Tanba kondisaun estrada, nune’e halo ema barak sei dúvida kuandu fó volta loron ida, rua ka tolu. “Kolega estranjeiru sira mai direta koko maibé dehan ne’e imposivel maski sira fó suporta nafatin ha’u, mas ne’e dezafia liután ha’u”.

Nune’e atubele atinje meta iha loron ida, Boy ne’ebé dezde ki’ik gosta sa’e bisikleta ne’e dehan bele tanba koko uluk ona iha terrenu hodi hale’u uluk Timór ho loron haat, tun ba rua durante ne’e maka sei bele.

“Difikuldade dalaruma sei hetan iha dalan, maibé tenke fiar an, tanba motór bele hetan fallansu uitoan, ita bele monu, ne’e mak ha’u-nia preparasaun mak tenke másima kona-ba safety riding” (seguransa bainhira lori motor).

Husi kilómetru 0 iha sidade Dili iha Palásiu Governu oin, Boy sei kontinua bá Manatutu, Baukau, Lautein, Iliomar, Watukarabau-Uatulari-Vikeke, Natarbora, Betano, Hatu-Udu (Ainaru), Zumalai-Suai-Vila-Maukatar-Altu-Lebus-Ozo-Oeleu, Maliana Vila, Balibo, Batugadé, Likisá no mai fali Dili.

“Ne’ebé ha’u-nia pontu dahaluk ne’e husi Dili bá liu Lospalos, para enxe mina minutu 10 depois kontinua fali no para iha Vikeke deskansa minutu 30 hanesan ne’e, kontinua bá Suai no enxe mina iha ne’ebá, mai para tan iha Maliana Vila no kontinua mai fali Dili”, nia haktuir.

Koa’lia kona-ba aventura hanesan dezafiu ida, tanba ne’e Atanásio lata’uk bainhira halai motór mesak tanba hakarak hatudu ba komunidade motor adventure katak Timór ne’e iha kondisaun dame. “Ha’u hakarak promove Timór ne’e seguru”, katak nia ho hamnasa oin midar.

Jornalista: Maria Auxiliadora

Editora: Rita Almeida

Publisidade

Leave a Reply

Latest Post

error: Content is protected !!