DILI, (TATOLI) – Profisionál Komunikasaun Sosiál hamutuk 26 simu sertifikadu partisipasaun iha “Literasia Orsamentál no Finanseira” ne’ebé organiza husi projetu parseria ba melloria prestasaun servisu liuhusi reforsu jestaun no supervizaun finansas públikas (PFMO, sigla iha inglés), Konsultóriu Língua ba Jornalista (Instituto Camões) ho kolaborasaun ho CENJOR (Centro de Formação de Jornalistas de Portugal) ne’ebé hala’o durante semana rua husi 13 to’o 23 novembru ne’e.
Iha serimónia entrega sertifikadu, Embaixadór Portugál ba Timor-Leste, José Pedro Machado Vieira, hatete hafoin formasaun ne’e hotu-hotu bele sai ho hariku no esklaresidu ho matéria ne’ebé iha komplesidade boot hanesan finansas públikas.
“Ami espera katak formandu sira ne’ebé benefisia diretamente ba asaun ne’e, bele fila ba orgaun komunikasaun sosiál no serbisu Estadu, reprezentativu televizaun nian, rádiu, imprensa eskrita no dijitál, iha ne’ebé profisionalmente inseridu, ami espera bele lori ho ita-boot sira no partilla ba ita-boot sira-nia kolega informasaun no hanorin sira ne’ebé inisiativa Camões hakarak tranzmite”, embaixadór Portugál katak iha serimónia entrega sertifikadu iha JL Vila, ohin.
Nia hatutan realizasaun jornada ne’e kontribui, sertamente, ba hadi’ak kompeténsia jornalista iha akompañamentu tema relativu ba ekonomia no finansas públikas, liuliu ba asuntu orsamentál no supervizaun konta públika nian.
“Formasaun ne’e, partisipante sei kapasitadu atu analiza kestaun orsamentál no finanseira, no liuhusi koñesimentu ne’e, di’ak liu bele tranzmite informasaun sobre finansas públikas ba leitór sira, sidadaun país ne’e, kontribui hanesan ne’e ba prosesu monitorizasaun husi sosiedade, fatór ne’ebé intervén iha desizaun uzu rekursu públiku nian”.
Asaun jornalista agora sei rigorozu no responsavel liu, hadi’ak funsionamentu instituisaun demokrátika, posibilidade akompañamentu husi parte sidadaun sira atu informadu liu ho ida ne’e kontribui ba kualidade opsaun Estadu no Governu nian.
“Rezultadu melloria kompeténsia profisonál no tratamentu informasaun nian husi jornalista no órgaun komunikasaun sosiál, matéria orsamentál no finanseira, sosiedade sivíl sei kapasitada atu ezerse nia funsaun kontrolu esternu finansas públikas Timor-Leste nian, nune’e Parlamentu Nasionál, Tribunál Rekursu/Kámara Konta, Prokuradoria Jerál Repúblika, PSIK, CAC, no Inspesaun Jerál Esatdu, nomós instituisaun sosiedade sivíl no auditoria sosiál, kontribuindu ba governasaun ida di’ak no reforsu demokrasia iha país”.
Embaixadór Uniaun Europeia iha Timor-Leste, Alexandre Leitão, hatete satisfeitu tebes ba asaun ne’ebé konkretizada, parseria UE entre Instituto Camões ne’ebé ezekuta progarama UE no parseiru timoroan (jornalista sira).
“Fundamentál tebes tanba tipu asaun ne’ebé ita pretende katak ita-nia kooperasaun ne’e ema persebe no bele identifika saida maka halo ho asaun konkreta ne’ebé verdadeiramente akontese”.
Nia dehan kabe ba demokrasia buat ida fundamentál iha atividade jornalístika, jornalista ida di’ak halo pergunta serta no difísil hodi kontribui ba esklaresimentu sidadaun.
Hatutan iha programa UE ho Governu Timor-Leste ne’ebé aplika iha país ne’e iha parte seluk mak boa governasaun ne’ebé hanaran PFMO ne’ebé ezekutadu diretamente husi Ministériu Finansas (MF) no iha parte seluk entidade públika, organizasaun naun governamentál no komunikasaun sosiál.
“Komunikasaun sosiál iha papél absolutamente determinante ba boa governasaun iha demokrasia. Komunikasaun sosiál mak instrumentu prinsipál komunikasaun entre podér polítiku no ema”, katak.
Sekretáriu Estadu Komunikasaun Sosiál, Merício Juvenal dos Reis “Akara”, orgullu ho jornalista ne’ebé termina formasaun ne’e ho susesu tanba finansas públikas mak área importante iha Timor-Leste.
Nia mós agradese ba Instituto Camões ba kooperasaun di’ak ne’e.
Jornada literasia finanseira ne’e dirije husi formadora Helena Garrido, dosente no jornalista ekonomia no finanseira husi Portugál.
Jornalista: Maria Auxiliadora
Editora: Rita Almeida
